ललितपुर माथि चितवनको जित

काठमाडौं । बागमती प्रदेश क्रिकेट टिमकाे छनोट खेलमा चितवन क्रिकेट एसोसियसनले ललितपुर क्रिकेट एसोसियसनलाई पराजित गरेको छ ।

टियु क्रिकेट मैदानमा शुक्रबार चितवनले ललितपुरलाई १ विकेटले पराजित गरेको हो ।

ललितपुरले दिएको १ सय ९७ रनको लक्ष्य चितवनले ३७ ओभर ४ बलमा ९ विकेट गुमाएर पुरा गर्यो ।

चितवनका लागि प्रतिक श्रेष्ठले अविजित रहदै ५७ रनको अर्धशतकीय इनिङ्स खेले ।

यस्तै गौतम केसीले ५५ रनको अर्धशतकीय इनिङ्स खेल्दा आकाश थापाले ४० रन बनाए ।

ललितपुरका सुमित झा र विपिन आचार्यले ३/३ विकेट लिए ।

यस अघि टस जितेर पहिले ब्याटिङ गरेको ललितपुरले ४० ओभरमा ६ विकेट गुमाएर १ सय ९६ रन बनाएको थियो ।

ललितपुरका विवेक राना मगरले ४५ रन जोड्दा विपिन आचार्यले ३५ रन बनाए । दुर्गेस थापाले २२ तथा आदील खानले २१ रन जोडे ।

चितवनका दिपेश श्रेष्ठले ३ विकेट लिए ।

छनोट अन्तर्गत नै अर्को खेलमा मकवानपुरले नुवाकोटलाई २ सय १३ रनले हराएको छ ।

मकवानपुरले दिएको २ सय ६९ रनको लक्ष्यसहित जवाफी ब्याटिङ गरेको नुवाकोट ५५ रन जोड्दा अलआउट भयो ।