काठमाडौँ । प्रधानमन्त्री कप (पीएम कप) महिला राष्ट्रिय प्रतियोगिता शनिवारबाट सुरु हुँदैछ ।
दाङको लमहीमा हुने प्रतियोगितामा विभागीय टिम एपीएफसहित अन्य सात प्रदेशको सहभागिता रहने छ ।
नेपाल क्रिकेट संघ (क्यान) ले प्रतियोगिताको लागि खेल तालिका समेत सार्वजनिक गरिसकेको छ । अधिकांश टिमले आफ्नो खेलाडी छनोट गरिसकेका छन् । प्रतियोगिताको लागि महिला टिमहरु दाङ प्रस्थान गर्ने क्रम सुरु भएको छ ।
तर बागमती प्रदेशले भने प्रतियोगिताको लागि खेलाडी छनोट प्रतियोगिता सुरु भएपछि मात्र गर्दै छ ।
बागमती प्रदेशले पौष ११ बाट चितवनमा महिला छनोट सुरु गर्न लागेकाे छ ।
दाङमा पीएम कप सुरु हुँदा चितवनमा निर्माणाधीन गौतमबुद्ध अन्तराष्ट्रिय क्रिकेट रंगशालाको नमुना खेल मैदानमा बागमती प्रदेशको महिला खेलाडी छनोट सुरु लागेकाे हाे ।
दुई दिन चल्ने छनोट पीएम कपको क्याम्पको रुपमा हेरिएको छ ।
बागमती प्रदेशमा महिला खेलाडीको प्रशस्त उपलब्ध नभएको कारण अधिकांश खेलाडी पुरानै अनुहार हुनेछन् । ३-४ नयाँ अनुहार टिममा देखिन पाउने आश रहेको कारण छनोटनै क्याम सरह रहने छ ।
चितवन र काठमाडौंका खेलाडीलाई ३ टिममा विभाजन गर्दै खेल खेलेर टिम छनोट गरिने छ। छनोटनै बागमतीको क्याम्प रहने छ ।
छनाेट क्याम्प ११ र १२ गते सकेर १३ गते टिम घोषणा गर्दै बागमती टिम पीएम कपको लागि दाङ प्रस्थान गर्ने तयारीमा छ ।
दाङ पुगेको भोलीपल्ट बागमतीले प्रतियोगिता खेल्ने कार्यक्रम छ।
बागमतीले प्रतियोगितामा पहिलो खेल १४ गते प्रदेश १ संग खेल्ने छ । समुह 'बी' मा रहेको बागमतीले दाङ पुगेको २४ घण्टा नबित्दै मैदान उत्रने भएकाे हाे ।
यसरी झन्डै ६ घण्टाको लामो यात्रा गर्दै बिना कुनै आराम मैदान उत्रनु खेलाडीको लागि चुनौती हुने काठमाडौँकी कप्तान अश्मिना कर्माचार्य बताउँछिन् ।
'१३ गते लामो यात्रा गरेर १४ गते प्रतिस्पर्धात्मक खेल खेल्नु खेलाडीलाई पक्कै गाह्रो हुन्छ । पुरुषको जस्तो शरीर महिलाको हुँदैन ।' काठमाडौँ जिल्लाको कप्तान अश्मिनाले भनिन्, 'तर यो हाम्रो लागि एक मौका र अवसर हो यसलाई सदुपयोग गर्ने लक्ष्यमा छौं । यद्दपी अघिल्लो दिन लामो यात्रा गरेर खेल्न भने कठिन हुन्छ । एकदिनको आराम कम्तिमा आवश्यक थियो । एक दिन आराम गर्न पाएको भए प्रदर्शनमा कमि आउने सम्भावना कम हुन्थ्यो ।'
राष्ट्रिय टिमको प्रतिनिधित्व गरिसकेकी आरती बिडारी समेत आराम दिन नभएको कारण खेलमा असहज हुन सक्ने बताउँछिन् ।
'छनोटमा खासै नयाँ खेलाडी आउने सम्भावना कम छ । यो छनोट हाम्रो क्याम्प जस्तै हो ।' आरती भन्छिन्, 'लामो यात्रा गरेर भोली खेल्नु पक्कै सहज हुँदैन । तर यो चुनैतीको सामना हामीले गर्नु पर्छ । खेलमा प्रर्दशन खस्किन नदिन कप्तानको भूमिका समेत महत्वपूर्ण हुन्छ ।'
प्रतियाेगिता सुरु भएकाे पर्सीपल्ट दाङ प्रस्थान गर्ने तयारीमा रहेको बागमती प्रदेशको टिमलाई आरतीले १२ गते बेलुकीनै प्रस्थान गर्न सुझाब दिएको बताउँछिन् ।
'१३ गते गएर १४ गते खेल्नु पर्छ, दमौलीको बाटो जाम हुन्छ ।' आरतीले थपिन्, 'जाममा बस्दै ढिलो पुगेर मैदान उत्रनु भन्दा १२ गते बेलुकी हिड्यो भने १३ गते आराम समेत गर्न पाइन्छ ।'
आरतीले प्रतियोगितामा आफुहरुको खेल ढिलो भएको कारण छनोट समेत ढिलो भएको हुनसक्ने अनुमान गरिन् ।
बागमती प्रदेश क्रिकेट संघले समेत आफुहरुको खेल ढिलो भएको कारण क्याम्प ढिलो राखिएको बताएकाे छ ।
'हाम्रो खेल ढिलो भएको तालिका आएपछि हामीले चितवनमा क्याम समेत ढिलो गराएका हौँ ।' बागमती क्रिकेट संघका अध्यक्ष राजु बस्नेतले भने, 'काठमाडौँमा खेलाडी बोलाएर क्याम गर्ने अनि फेरी चितवन हुँदै दाङ जानु भन्दा सबैलाई चितवनमा क्याम गराएर उतैबाट जान सहज हुने भएर ढिलो गरिएको हो ।'
क्याम्पको लागि काठमाडौँबाट टिम शुक्रबार चितवन प्रस्थान गर्दै छ ।
काठमाडौँबाट खेलाडीहरु आफ्नै खर्चमा चितवन जानु परेको भन्दै एक खेलाडीले गुनासो गरिन् ।
तर लामो समय पछि महिला खेलाडीहरु मैदान उत्रन पाउँदा निकै उत्साहित रहेको बताउँछन् । गत वर्ष १३ औं दक्षिण एसियाली खेलकुद अन्तर्गतको क्रिकेट खेलेपछि महिला खेलाडीले मैदान उत्रने मौका पाएका थिएनन् ।
घरेलु प्रतियोगितामा समेत गत वर्ष भएको पहिलो संस्करणकाे वुमन्स च्याम्पियन्स लिग (डब्लुसीएल) खेले यता खेलाडीहरु घरैमा बस्न बाध्य छन् ।
महिला पीएम कपमा सहभागी टिमलाई दुई समुहमा विभाजन गरिएको छ । ८ टिमले एकआपसमा खेल्दै शीर्ष २ टोली सेमिफाइनल पुग्ने छन् । समुह एको विजेताले समुह बीको उपविजेता र समुह बीको विजेताले समुह ए को उपविजेतासंग सेमिफाइनल खेल्ने छन् ।
समुह ए मा एपीएफ, प्रदेश २, कर्णाली प्रदेश र लुम्बिनी प्रदेश रहेका छन् । यस्तै समुह बीमा सुदुरपश्चिम प्रदेश, बागमती प्रदेश, गण्डकी प्रदेश र प्रदेश १ रहेका छन् ।
