राष्ट्रिय टिमको बन्द प्रशिक्षण भोलीबाट

काठमाडौं । राष्ट्रिय फुटबल टिमको बन्द प्रशिक्षण भोली (आईतबार)बाट सुरु हुने भएको छ ।

अखिल नेपाल फुटबल संघ (एन्फा)ले विश्वकप छनोटको तयारी स्वरुप राष्ट्रिय टिमको प्रशिक्षण आईतबारबाट सुरु गर्न लागेको हो ।

एन्फाले यसअघिनै ५८ जना खेलाडीलाई बन्द प्रशिक्षणमा बोलाईसकेको छ । बन्द प्रशिक्षणबाट दुई वटा टिम बनाउने एन्फाको योजना छ ।

एन्फाले पुराना र नयाँ खेलाडीलाई समावेश गर्दै बन्द प्रशिक्षणमा बोलाएको हो । प्रारम्भिक टोलीमा पूर्व कप्तान विराज महर्जनदेखि कारबाहीमा परेका विमल घर्तिमगर सहितका खेलाडी समावेश छन् ।

नेपाली टिमलाई कार्यवहाक प्रशिक्षकको रुपमा बालगोपाल महर्जनले नेतृत्व गर्नेछन् । मुख्य प्रशिक्षक योहान कालिनले नेपाली टिमको मुख्य प्रशिक्षक पदबाट राजीनामा दिएसंगै एन्फाले महर्जनलाई कार्यवहाक प्रशिक्षक तोकेको हो ।

एन्फाले विश्वकप छनोट प्रतियोगिताको तयारी गर्न उपाध्यक्ष उपेन्द्रमान सिंहलाई संयोजक तोकेको छ भने स्थानीय संयोजक विजय घलेलाई जिम्मेवारी दिएको छ ।

प्रतियोगिताको सुरक्षाको कमाण्ड दिनेश व्यन्जनकारले सम्हाल्नेछन् ।

शुक्रबार मात्र एसियाली फुटबल महासंघ (एएफसी)ले विश्वकप छनोटको बाँकी खेलको तालिका सार्वजनीक गरेको थियो ।

नयाँ तालिका अनुसार नेपालले चैत १२ गते चाईनिज ताईपेसंग, चैत १७ गते अष्ट्रेलिायसंग र जेठ २४ गते जोर्डनसंग खेल्नेछ ।