एजेन्सी । इंग्लिस प्रिमियर लिग फुटबलमा साविक विजेता लिभरपुल बराबरीमा रोकिएको छ ।
शनिबार भएको खेलमा लिभरपुल ब्राइटनसँग १-१ गोलको बराबरीमा रोकिएको हो ।
ब्राइटनको घरेलु मैदानमा सुरुवाती अग्रता जोगाउन नसक्दा लिभरपुलले बराबरी खेलेको हो ।
पहिलो हाफ गोलरहित बराबरीमा सकिएको खेलको ६० औं मिनेटमा डिएगो जोटाले गोल गर्दै लिभरपुललाई सुरुवाती अग्रता दिलाएका थिए ।
जोटाले मोहमद सलाहको पासमा गोल गरेका थिए ।
तर, खेलको इन्जुरी समयमा पास्कल ग्रोसले पेनाल्टीमा गोल गर्दै ब्राइटनलाई हारबाट जोगाए ।
लिभरपुलका एण्डरसनले पेनाल्टी क्षेत्रमा ड्यानी वेल्ब्याकलाई लडाएपछि ब्राइटनले पेनाल्टी पाएको थियो । जसमा ग्रोसले सहजै गोल गरे ।
त्यसअघि पहिलो हाफमा ब्राइटनले पेनाल्टीबाट गोल गर्ने अवसर गुमाएको थियो ।
खेलको २० औं मिनेटमा निल माउपेले पेनाल्टीमा गोल गर्न सकेनन् । उनको प्रहार बाहिरिएको थियो ।
त्यस्तै लिभरपुलका सलाहले ३४ औं मिनेटमा गरेको गोलले मान्यता पाएन । सलाह अफसाइड देखिएको थियो ।
खेलको ८४ औं मिनेटमा साडियो मानेको गोलले समेत मान्यता नपाउँदा लिभरपुल अग्रता दोब्बर बनाउनबाट बन्चित भएको थियो ।
हेडमार्फत गोल गरेका माने समेत अफसाइड देखिएका थिए ।
ब्राइटनसँग बराबरीमा रोकिएपनि लिभरपुल शीर्ष स्थानमा उक्लिएको छ ।
लिभरपुलले १० खेलमा २१ अंक जोडेको छ ।
ब्राइटन १० अंक जोडेर १६ औं स्थानमा रहेको छ ।
