क्रोएसियामाथि पोर्चुगलको जित

एजेन्सी । यूईएफए नेसन्स लिग फुटबलमा साविक विजेता पोर्चुगलले क्रोएसियालाई पराजित गरेको छ ।

मंगलबार राति भएको समूह चरणको अन्तिम खेलमा पोर्चुगलले क्रोएसिया ३-२ गोल अन्तरले पराजित गरेको हो ।

क्रोएसियाको घरेलु मैदानमा एक गोलले पछि परेको पोर्चुगलले पुनरागमन जित निकालेको हो ।

खेलको २९ औं मिनेटमा माटियो कोभासिचले गोल गर्दै क्रोएसियालाई अग्रता दिलाएका थिए ।

खेलको ५१ औं मिनेटमा मार्को रोगले रातो कार्ड पाएपछि क्रोएसिया १० खेलाडीमा समेटियो ।

५२ औं मिनेटमा रुबेन डियाजले गोल गर्दै पोर्चुगललाई १-१ गोलको बराबरीमा ल्याए ।

खेलको ६० औं मिनेटमा जोआ फेलिक्सले गोल गर्दै पोर्चुगललाई २-१ को अग्रता दिलाए ।

खेलको ६५ औं मिनेटमा कोभासिचले व्यक्तिगत दोस्रो गोल गर्दै क्रोएसियालाई २-२ गोलको बराबरीमा ल्याए ।

तर, खेलको इन्जुरी समयमा डियाजले व्यक्तिगत दोस्रो गोल गर्दै पोर्चुगललाई ३-२ को जित दिलाए ।

जितसँगै लिग 'ए' समूह सीको पोर्चुगलले ६ खेलमा ४ जितसहित १३ अंक जोड्यो ।

पोर्चुगल समूहको दोस्रो स्थानमा रह्यो । तर, साविक विजेता पोर्चुगल यस पटक भने सेमिफाइनलमा पुग्न असफल भयो ।

तेस्रो स्थानमा रहेको क्रोएसिया भने रेलिगेसनबाट जोगिएको छ । क्रोएसियाले ६ खेलमा ३ अंक जोड्यो ।