काठमाडौं । नेपाल र बंगलादेशबीचको ‘मुजिब वर्ष फिफा अन्तराष्ट्रिय फुटबल सिरिज’ घरेलु टिमले जितेको छ ।
ढाकास्थित बंगबन्धु राष्ट्रिय रंगशालामा मंगलबार भएको दोस्रो मैत्रीपूर्ण खेलमा नेपालसँग गोलरहित बराबरी खेल्दै बंगलादेशले सिरिज आफ्नो बनाएको हो ।
मंगलबार भएको पहिलो खेलमा २-० को जित निकालेको बंगलादेशले दोस्रो खेलमा बराबरी खेलेपनि सिरिज आफ्नो बनाएको हो ।
बंगलादेशविरुद्धको दुई मैत्रीपूर्ण खेलको सिरिज गुमाएपनि नेपालका ६ युवा खेलाडीले डेब्युको अवसर पाए ।
पहिलो खेलमा ३ खेलाडीलाई डेब्यु अवसर दिएका प्रशिक्षक बाल गोपाल महर्जनले दोस्रो खेलमा समेत ३ खेलाडीलाई डेब्युको अवसर थिए ।
प्रशिक्षक महर्जनले दोस्रो मैत्रीपूर्णमा छिरिङ गुरुङलाई सुरुवाती-११ मै अवसर दिएका थिए । यस्तै पुजन उपरकोटी र सेसेहाङ आङदेम्बेले दोस्रो हाफमा डेब्युको अवसर पाए ।
राष्ट्रिय टिममा डेब्यु गर्ने ६ युवा खेलाडीबारे तल चर्चा गरिएको छ ।
विकाश खवास -
नेपाल आर्मी क्लबका डिफेन्डर समेत रहेका खवास पहिलो पटक राष्ट्रिय टिममा परेका हुन् । यस अघि क्लोज क्याम्पको अन्तिम चरणमा पुगेर बाहिरिँदै आएका उनी पहिलो पटक राष्ट्रिय टिममा पर्न सफल भए र पहिलो अवसरमै डेब्यु गर्न सफल रहे ।
प्रशिक्षक बाल गोपाल महर्जनले विकाशलाई विश्वास गर्दै प्लेईङ सेटमै खेलाएका थिए । मोरङ निवासी खवासले पुरा समय समेत खेले ।
आर्मीका भरपर्दा डिफेन्डर खवास एन्फा एकेडेमीका उत्पादन समेत हुन् । उनले नेपाल उमेर समूहबाट दुई उपाधि समेत हात पारेका छन् । भुटानमा आयोजना भएको यू–१८ साफ च्याम्पियनसिप र नेपालमै आयोजना भएको १३ औं दक्षिण एसियाली प्रतियागिता सागमा नेपालले स्वर्ण जित्दा खवास टिमका महत्वपूर्ण खेलाडी थिए ।
यस अघि विना रेलिगेशनको ए डिभिजन आयोजना हुँदा आर्मी क्लबको प्रतिनिधित्व गर्दै खवासले युवा उदीयमान खेलाडीको उपाधि हात पारेका थिए ।
एरिक विष्ट -
पहिलो पटक राष्ट्रिय टिममा स्थान बनाउन सफल एरिक पहिलो अवसरमै सिनियर टिमबाट डेब्यु गर्न सफल भएका हुन् । सुरुवाती समय बेन्चमा रहेका मिडफिल्डर एरिकलाई प्रशिक्षक महर्जनले पहिलो हाफमै मैदान प्रवेश गराएका थिए ।
मिडफिल्डर विक्रम लामाले चोट बोकेपछि महर्जनले एरिकलाई पहिलो हाफको ४२ औं मिनेटमा मैदान प्रवेश गराएका थिए ।
हालै सम्पन्न ए डिभिजन लिगमा एरिकले न्युरोड टिम एनआरटीबाट खेलेका थिए । बासबारी युवा क्लबका उत्पादन एरिकले घरेलु यू–१८ प्रतियोगितामा आर्मीलाई दुई पटक उपाधि दिलाएका थिए ।
यस्तै उनले नेपाललाई भुटानमा भएको साफ यू–१८ च्याम्पियनसिपको उपाधि दिलाएका थिए ।
यस अघि कोरोना संक्रमित एरिक ठिक हुँदै टिममा फर्किएका हुन् ।
दर्शन गुरुङ -
दर्शन पछिल्लो एन्फा ब्याजबाट राष्ट्रिय टिममा स्थान बनाउने एक्ला खेलाडी हुन् । पहिलो पटक राष्ट्रिय टिममा स्थान बनाएका मिडफिल्डर तथा विंगर दर्शक पहिलो अवसरमै डेब्यु गर्न सफल भए ।
गत सिजन न्यूरोड टिम एनआरटीबाट उत्कृष्ट प्रदर्शन गर्दै दर्शन पहिलो पटक राष्ट्रिय टिमको क्लोज क्याम्पको लागि छनोट भएका थिए । गत लिगमा दर्शन युवा उदयीमान खेलाडी समेत घोषित भएका थिए ।
इलाम नगरी दर्शनले उमेर समूहमा भने नेपाललाई उपाधि दिलाउन सफल भएनन् । आयोजक नेपाल समूह चरणबाटै बाहिरिँदा लगातार तेस्रो पटक यू–१८ साफ च्याम्पियनसिपका उपाधि हात पार्नबाट बञ्चित भएको थियो ।
प्रशिक्षक महर्जनले दर्शनलाई दोस्रो हाफमा मैदान प्रवेश गराएका थिए । अर्का विंगर रवि पासवानलाई दर्शनले खेलको ६९ मिनेटमा स्थानानन्तरण गरेका थिए ।
छिरिङ गुरुङ-
छिरिङ गुरुङले दोस्रो मैत्रीपूर्णमा प्लेईङ सेटमै रहेर डेब्युको अवसर पाए ।
च्यासल युवा क्लबका राईट ब्याक छिरिङले बंगलादेश भ्रमणका लागि पहिलो पटक राष्ट्रिय टिममा स्थान बनाएका थिए ।
डिफेन्डर छिरिङले डेब्यु खेलमा पुरा समय मैदानमा बिताए ।
इलामका छिरिङले उमेर समूहको प्रतियोगितामा भने नेपालबाट खेलिसकेका थिए ।
पुजन उपरकोटी -
झापा घर भएका पुजनले पहिलो पटक राष्ट्रिय टिममा स्थान बनाएका हुन् । उनी पहिलो अवसरमै राष्ट्रिय टिमबाट डेब्यु गर्न सफल पनि भए ।
प्रशिक्षक महर्जनले पुजनलाई दोस्रो हाफमा मैदान प्रवेश गराएका थिए । अर्का मिडफिल्डर तेज तामाङको स्थानमा पुजन ४६ औं मिनेटमा मैदान छिरेका थिए ।
गत लिगमा पुजनले मनाङ मर्स्याङ्दी क्लबबाट लिग खेलेका थिए । झापा-११ ले उत्पादन गरेको पुजनले नेपाल यू-२३ टिमबाट भने खेलिसकेका थिए ।
सेसेहाङ आङदेम्बे -
सेसेहाङ प्रशिक्षक महर्जनले बंगलादेश भ्रमणको दौरान डेब्यु गराएका अन्तिम खेलाडी हुन् ।
त्रिभुवन आर्मी क्लबका मिडफिल्डर समेत रहेका सेसेहाङले पहिलो पटक राष्ट्रिय टिममा स्थान बनाएका थिए । उनले पहिलो अवसरमै राष्ट्रिय टिमबाट डेब्यु गरे ।
प्रशिक्षक महर्जनले सेसेहाङलाई दोस्रो हाफमा मैदान प्रवेश गराएका थिए । विंगर तथा मिडफिल्डर दर्शन गुरुङको स्थानमा सेसेहाङ ७२ औं मिनेटमा मैदान छिरेका थिए ।
आर्मी गत सिजनको लिगमा उपविजेता बन्दा सेसेहाङको भूमिका महत्वपूर्ण रहेको थियो ।
सेसेहाङ नेपालले यू-१८ साफ च्याम्पियनसिप र १३ औं दक्षिण एसियाली खेलकुद प्रतियोगिता सागको उपाधि हात पार्दा टोलीका महत्वपूर्ण खेलाडी थिए ।
-1753270648.jpeg)
