युनिस खान पाकिस्तानको ब्याटिङ प्रशिक्षक

एजेन्सी । पाकिस्तानका पूर्व क्रिकेटर युनिस खान पाकिस्तान क्रिकेट टिमको ब्याटिङ प्रशिक्षक नियुक्त भएका छन् ।

पाकिस्तान क्रिकेट बोर्ड (पीसीबी) ले बिहीबार युनिसलाई ब्याटिङ प्रशिक्षकमा नियुक्त गरिएको जनाएको छ ।

पाकिस्तानका पूर्व कप्तान समेत रहेका युनिसलाई २०२२ को विश्वकपसम्मको लागि ब्याटिङ प्रशिक्षक नियुक्त गरिएको पीसीबीले जनाएको छ ।

४२ वर्षीय मिडल अर्डर ब्याट्सम्यान युनिसले पाकिस्तानका लागि १ सय १८ टेस्टमा १० हजार ९९ रन बनाएका थिए ।

यस्तै उनले २ सय ६५ एकदिवसीयमा ७ हजार २४९ रन जोड्दा २५ टी-त्व्नतीमा ४ सय ४२ रन जोडेका थिए ।

युनिस पाकिस्तानका लागि टेस्ट क्रिकेटमा सर्वाधिक शतक बनाउने खेलाडी हुन् । उनले पाकिस्तानका लागि ३४ शतक बनाएका थिए ।

पाकिस्तानले सन् २००९ मा टी-ट्वान्टी विश्वकप जित्दा उनी टिमका कप्तान रहेका थिए ।