किमिच जनवरीसम्म मैदान बाहिर

एजेन्सी । जर्मन क्लब बायर्न म्युनिखका मिडफिल्डर जनवरीसम्म मैदान बाहिर रहने भएका छन् ।

घुँडाको चोटको शल्यक्रिया गरेपछि किमिच आगामी जनवरीसम्म मैदान बाहिर रहने भएका हुन् ।

जर्मनीका मिडफिल्डर किमिचले शनिबार बोरुसिया डर्टमण्डसँगको खेलमा चोट बोकेका थिए ।

डर्टमण्डका अर्लिङ हालाण्डसँग ठोक्किएपछि चोट बोकेका उनी ३६ मिनेटमा मैदानबाट बाहिरिएका थिए ।

डर्टमण्डको मैदानमा भएको उक्त खेलमा बायर्न ३-२ ले विजयी भएको थियो ।

२५ वर्षीय किमिचको आइतबार दाहिने घुँडाको सफल शल्यक्रिया गरिएको छ ।

किमिचले नेसन्स लिग अन्तर्गत यसै महिना हुने स्पेन र युक्रेनसँगको खेल समेत गुमाउने भएका छन् ।

यस्तै किमिचले नेसन्स लिग अघि तय भएको चेक रिपब्लिकविरुद्धको मैत्रीपूर्ण समेत गुमाउने छन् ।

किमिचले यस सिजन बुन्डेसलिगाको ६ खेलमा १ गोल गरेका छन् ।