म्याद सकिएको ५ महिनापछि वर्गीकरण !

काठमाडौं । नेपाल क्रिकेट संघ (क्यान) को सेन्ट्रल कन्ट्रयाक्टमा परेका राष्ट्रिय क्रिकेट टिमका पुरुष र महिला खेलाडीको वर्गीकरणले शनिबार मात्रै पूर्णता पायो ।

यस अघि गत असोज ६ गते चितवनको भरतपुरमा बसेको क्यानको बोर्ड बैठकले सन् २०२० को लागि पुरुष तथा महिला खेलाडीको वर्गीकरण तयार गरेको थियो ।

क्यानले सार्वजनिक गरेको वर्गीकरणमा पुरुषतर्फ १८ र महिलातर्फ १९ खेलाडी राखिएको थियो । तर, नयाँ वर्गीकरण सार्वजनिक हुँदा क्यानले आलोचना खेप्नु पर्यो ।

चौतर्फी विरोधपछि क्यानले वर्गीकरण परिमार्जन गर्ने बतायो । र, खेलाडी वर्गीकरण छनोट समितिले तयार गरेको नयाँ वर्गीकरणलाई शनिबार बसेको क्यानको बोर्ड बैठकले सर्वसम्मतले पारित गरेको थियो ।

अघिल्लो वर्गीकरणमा उत्कृष्ट प्रदर्शन गर्दै आइरहेका खेलाडी तल्लो श्रेणीमा पर्नु र केहि खेलाडी वर्गीकरण बाहिर रहेका थिए । त्यतिमात्र नभई २०१९ मा अन्तराष्ट्रिय खेलमा सहभागिता नभएका खेलाडी समेत वर्गीकरणमा परेका थिए ।

परिमार्जन वर्गीकरणमा २० पुरुष खेलाडी र २२ महिला खेलाडी परेका छन् ।

बलर सोमपाल कामीलाई 'ए' श्रेणीमा राखिएको छ । यस अघि उनलाई 'बी' मा राखिएको थियो । 'सी' मा रहेका अविनास बोहरालाई 'बी' मा राखिएको छ ।

यस अघि कन्ट्रयाक्टमा नपरेका ललित नारायण राजवंशीलाई 'बी' र सन्दीप जोहरालाई 'सी' मा राखिएको छ ।

महिलातर्फ सरस्वती चौधरीलाई 'बी' तथा ममता चौधरी र सुमन खतिवडालाई 'सी' श्रेणीमा राखिएको छ ।

सुरुवातको वर्गीकरणमा अटाउन नसकेका र फरक वर्गीकरणमा परेका खेलाडी नयाँ वर्गीकरणमा कसरि अटाए त ?

'सुरुमा २४ खेलाडी वर्गीकरण गर्ने भनिएको थियो पछि १८ मा झारियो । अहिले २० खेलाडी गर्ने भनेको भएर २ खेलाडी थपिएका हुन्,' क्यान सदस्य तथा खेलाडी वर्गीकरण समितिका सदस्य दुर्गाराज पाठक भन्छन्, 'वर्गीकरण खेलाडीको घरेलु तथा अन्तर्राष्ट्रिय प्रदर्शन, क्रिकेटमा पुर्याएको योगदान, अनुशासन र पुराना खेलाडीलाई मध्यनजर गरेर बनाइएको हो ।'

क्यानले खेलाडी सेन्ट्रल कन्ट्रयाक्टमा राख्दै वर्गीकरण गर्नु आफैमा सुखद पक्ष हो । क्यानले महिला क्रिकेटका खेलाडीलाई पहिलो पटक सेन्ट्रल कन्ट्रयाक्टमा राखेको हो ।

तर, क्यानले झारो टार्ने तरिकाले समेत वर्गीकरण गरेको छ । क्यानले यसलाई औपचारिकता मात्र दिएको छ ।

खेलाडीको सेन्ट्रल कन्ट्रयाक्टको म्यादबाटै क्यानको लापरबाही स्पस्ट देखिन्छ ।

यस अघि एक वर्षको सम्झौता भएको बताएको क्यानले शनिबार भने खेलाडीसँगको सम्झौता ६ महिनाको मात्र भएको बतायो । जस अनुसार खेलाडीको सम्झौता २०२० को जुनबाटै सकिएको छ ।

यता, क्यानले भने खेलाडीसँगको सम्झौता सकिएको ५ महिनापछि वर्गीकरणलाई बल्ल पूर्णता दिन सक्यो ।

नियमित मैदानमा रहदै आएका खेलाडीको वर्गीकरण गर्न त क्यानलाई हम्मेहम्मे पर्यो । सम्झौताको म्याद सकिएको ५ महिनापछि वर्गीकरणले पूर्णता पायो ।

अहिले कोरोनाको महामारीले खेलाडी करिब ८ महिनाबाट मैदान उत्रिएका छैनन् । यस्तो अवस्थामा क्यानले खेलाडीको नयाँ वर्गीकरण कसरी गर्ला ? प्रश्न उब्जिएको छ ।