बंगलादेशविरुद्ध नेपाल : हेड टु हेड कस्तो ?

काठमाडौं । कोरोना भाईरसको महामारीबीच नेपाली राष्ट्रिय पुरुष फुटबल टिमले बंगलादेशसँग दुई मैत्रीपूर्ण खेल खेल्दैछ ।

नेपालले कात्तिक २८ र मंसिर २ गते बंगलादेशसँग उसैको मैदानमा प्रतिस्पर्धा गर्ने तालिका रहेको छ ।

२५ खेलाडीसहित ३४ सदस्सीय नेपाली टिम ढाका पुगिसकेको छ । बंगलादेश पुगेको नेपाली टिम ढाकामै क्वारेन्टिनमा रहेको छ ।

यस्तै ढाका पुगेर नेपाली टिमको कोरोना परिक्षण समेत गरिएको छ । परिक्षणको रिपोर्ट भने सार्वजनिक भएको छैन।

कोरोना परिक्षणको रिपोर्ट आएपछि नेपाली टिमले प्रशिक्षण थाल्नेछन् । मैत्रीपूर्ण खेल अघि ढाकामा नेपाली टिमले करिब एक साता प्रशिक्षण गर्ने छन् ।

फिफा विश्वकप छनोटको दोस्रो चरण खेलिरहेको नेपालले तयारीका लागि मैत्रीपूर्ण खेल खेल्न लागेको हो ।

नेपालले साफ च्याम्पियनसिपपछि बंगलादेशसँग खेलेको छैन । २०७५ सालको भदौंमा ढाकामा भएको साफको समूह चरणमा नेपालले बंगलादेशलाई २-० ले हराएको थियो ।

बंगलादेश नेपालका लागि चिरपरिचित प्रतिद्वन्दी हो । तर, बंगलादेशविरुद्धको ‘हेड टु हेड’ मा नेपाल निकै पछि रहेको छ ।

नेपाल र बंगलादेशबीच हालसम्म १९ पटक प्रतिस्पर्धा भएको छ । जसमा बंगलादेशले १२ खेल जितेको छ भने नेपालले ६ खेल मात्रै जितेको छ । एक खेल भने नतिजा विहिन भएको छ ।

सन् १९८३ मा नेपालले बंगलादेशसँग पहिलो पटक खेलेको थियो । मर्डेका कपमा नेपाल बंगलादेशसँग १–० गोल अन्तरले पराजित भएको थियो ।

त्यसपछि नेपालले बंगलादेशसँग साउथ एसियन फुटबल फेडेरेसन (साफ) च्याम्पियनसिप र साउथ एसियन गेम्स (साग) ७–७ पटक भिडेका छन् ।

यस्तै दुई मैत्रीपूर्ण खेल खेल्दा एसियन गेम र एएफसी एसियन कपमा एक एक पटक प्रतिस्पर्धा गरेका छन् ।

बंगलादेशविरुद्धको पछिल्ला ५ भेटमा भने नेपालले बाजी मार्दै आएको छ ।

सन् २०११ मा भएको साफ पछि नेपाल बंगलादेशसँग एक पटक मात्रै पराजित भएको छ । नेपालले तीन खेलमा जित निकाल्दा १ खेल बराबरी खेलेको छ ।