एजेन्सी । च्याम्पियन्स लिग फुटबलको समूह चरण अन्तर्गत आज फ्रेन्च क्लब पेरिस सेन्ट जर्मेन (पीएसजी) ले जर्मन क्लब आरबी लाइपजिगसँग प्रतिस्पर्धा गर्दैछ ।
पीएसजीले समूह चरणको तेस्रो खेलमा जर्मन क्लबसँग उसैको मैदानमा खेल्नेछ । पीएसजी र लाइपजिगबीचको खेल नेपाली समय अनुसार राति १:४५ बजे सुरु हुनेछ ।
जर्मन क्लबविरुद्ध मैदान उत्रदा पीएसजी दोस्रो जितको खोजीमा हुनेछ । तर, पीएसजीलाई जर्मन क्लबविरुद्ध जित निकाल्न सहज भने छैन ।
पीएसजी दुई मुख्य स्ट्राइकर नेयमार र केलियन एमबाप्पे बिना मैदान उत्रने छ । चोटका कारण दुबै खेलाडीले लाइपजिगसँगको खेल गुमाउने भएका हुन् ।
यस समूहमा २ खेलमा ३ अंक जोडेको पीएसजी दोस्रो स्थानमा रहेको छ ।
पीएसजीले पहिलो खेलमा म्यानचेस्टर युनाईटेडसँग पराजित भएको थियो । तर, दोस्रो खेलमा टर्किस क्लब इस्तानबुल बासाकसेरलाई हराएको थियो ।
लाइपजिग पनि पीएसजीलाई हराएर दोस्रो जित निकाल्न चाहन्छ । लाइपजिग ३ अंक जोडेर तेस्रो स्थानमा रहेको छ ।
लाइपजिगले पहिलो खेलमा इस्तानबुललाई हराएको थियो । दोस्रो खेलमा भने लाइपजिग युनाईटेडसँग पराजित भएको थियो ।
यसै समूहको अर्को खेलमा युनाईटेडले इस्तानबुलसँग खेल्नेछ ।
टर्किस क्लबविरुद्ध मैदान उत्रदा युनाईटेड लगातार तेस्रो जितको खोजीमा हुनेछ । २ खेलमा ६ अंक जोडेको युनाईटेड तालिकाको शीर्ष स्थानमा रहेको छ ।
इस्तानबुल भने अंक विहीन रहदै पुछारमा रहेको छ ।
-1753545694.jpg)
