सन्दीप आबद्द दिल्लीलाई प्ले अफ पुग्ने मौका
एजेन्सी । युएईमा जारी १३ औं संस्करणको इन्डियन प्रिमियर लिग (आईपीएल) टी-ट्वान्टी क्रिकेटमा आज (शनिबार) हुने पहिलो खेलमा दिल्ली क्यापिटल्सले साविक विजेता मुम्बई इन्डियन्ससँग प्रतिस्पर्धा गर्दैछ ।
नेपाली लेग स्पिनर सन्दीप लामिछाने आबद्द दिल्लीले दुबईमा मुम्बईसँग खेल्नेछ । दिल्ली र मुम्बईबीचको खेल नेपाली समय अनुसार अपरान्ह ३:४५ बजे सुरु हुनेछ ।
दुबई अन्तराष्ट्रिय क्रिकेट स्टेडियममा दिल्ली आठौं जितको खोजीमा हुनेछ । १२ खेलमा ७ जितसहित १४ अंक जोडेर दिल्ली तेस्रो स्थानमा रहेको छ ।
श्रेयस एयरको कप्तानीमा मैदान उत्रने दिल्ली मुम्बईलाई हराएर प्ले अफमा पुग्न चाहन्छ ।
प्ले अफ पुग्न दिल्लीलाई मात्र एक जितको खाचो रहेको छ । यस्तोमा दिल्ली मुम्बईलाई शिकार बनाउन चाहन्छ ।
यस सिजन सन्दीपले दिल्लीबाट खेल्ने मौका पाएका छैनन् । दिल्लीले सन्दीपलाई यस अघिको १२ खेलमा बेञ्चमा राखेको थियो ।
दिल्ली अघिल्लो भेटमा ब्यहोरेको हारको बदला लिन चाहन्छ । सिजनको पहिलो भेटमा दिल्लीलाई मुम्बईले ५ विकेटले हराएको थियो ।
मुम्बई भने यस अघि नै प्ले अफ पुगिसकेको छ । शीर्ष स्थानको मुम्बईले १२ खेलमा १६ अंक जोडेको छ ।
तर, केइरन पोलार्डको कप्तानीमा मैदान उत्रने मुम्बई दिल्लीलाई हराएर सिधै क्वालिफायर खेल्न चाहन्छ ।
शीर्ष दुई स्थानमा रहने टोलीले क्वालिफायर खेल्ने छन् । अब एक खेल जितेमा मुम्बईको शीर्ष दुई पक्का हुनेछ ।
चोटका कारण मुम्बईका नियमित कप्तान रोहित शर्मा मैदान उत्रने सम्भावना कम रहेको छ ।
