फिफा अध्यक्ष इन्फान्टिनोलाई कोरोना

एजेन्सी । विश्व फुटबलका सर्वोच्च निकाय फिफाका अध्यक्ष जियानी इन्फान्टिनोलाई कोरोना भाईरसको संक्रमण देखिएको छ ।

फिफाले मंगलबार एक विज्ञप्ति निकाल्दै अध्यक्ष इन्फान्टिनोलाई कोरोना भाईरसको संक्रमण देखिएको जनाएको छ ।

५० वर्षीय इन्फान्टिनोलाई कोरोनाको सामान्य लक्षणहरु देखिएको फिफाले जनाएको छ ।

'फिफा अध्यक्ष जियानी इन्फान्टिनोलाई आज कोरोना भाईरस पोजेटिभ देखिएको छ,' फिफाले भनेको छ,'अध्यक्षलाई सामान्य लक्षण देखिएकाले सेल्फ आईसोलेसनमा बसेका थिए । र, उहाँ कम्तिमा १० दिन क्वारेन्टिनमा रहने छन् ।'

यस्तै फिफाले अध्यक्ष इन्फान्टिनोको शिघ्र स्वास्थ्यलाभको कामना समेत गरेको छ ।

इन्फान्टिनो गत वर्ष दोस्रो कार्यकालका लागि अध्यक्ष चुनिएका थिए । फिफामा इन्फान्टिनोको नेतृत्व २०२३ सम्म रहने छ ।

पहिलो पटक इन्फान्टिनोले २०१६ देखि १९ सम्म फिफाको नेतृत्व गरेका थिए ।