स्कुल लिग खेल्न नाम दर्ताका लागि एन्फाको आह्वान

काठमाडौं । अखिल नेपाल फुटबल संघ (एन्फा) ले स्कुल लिग खेल्नका लागि विद्यालयहरुलाई नाम दर्ता गर्न आह्वान गरेको छ ।

एन्फाले मंगलबार एक सूचना जारी गर्दै प्रतियोगिता खेल्न इच्छुक उपत्यकाको तीन जिल्लासहित काभ्रे जिल्लाका विद्यालयलाई नाम दर्ता गर्न आह्वान गरेको हो ।

एन्फाले काठमाडौं, भक्तपुर, ललितपुर र काभ्रे जिल्लामा रहेका विद्यालयलाई समेटेर अन्तर विद्यालय लिग फुटबल प्रतियोगिता गर्ने तयारी गरेको छ ।

एन्फाले प्रतियोगिता आगामी मंसिर दोस्रो साताबाट संचालन गर्ने जनाएको छ । जसका लागि विद्यालयलाई नाम दर्ता गर्न आह्वान गरेको हो ।

एन्फाले सूचना प्रकाशित भएको १५ दिनभित्र एन्फा सचिवालयमा आवेदन दिनुपर्ने बताएको छ ।

प्रतियोगितामा सहभागी जनाउन विद्यालयले एसियाली फुटबल महासंघ (एएफसी)को मापदण्डमा अनुसार चल्नुपर्नेछ । सहभागी स्कुलले प्रशिक्षकमा न्युनतम एएफसी सी लाईसेन्स कोर्ष पुरा गरेका प्रशिक्षक टिममा हुनुपर्ने नियम लगाएको छ ।

स्कुलले यू-१५ टिममा २३ देखि ३० सम्म खेलाडी रहनुपर्ने बताएको छ ।

यस्तै प्रतियोगितामा सहभागी जनाउने टिमको होम मैदान समेत हुनुपर्नेछ । जसका लागि मापदण्ड समेत तोकेको छ । होम मैदानको चौडाई कम्तिमा ३५ देखी ५० र लम्बाईमा कम्तिमा ६० देखि १०० हुनुपर्नेछ ।

एन्फाले प्रतियोगिताबाट छनोट भएका खेलाडीलाई उमेर समूहको राष्ट्रिय टिमसम्म लैजाने उदेश्यसहित प्रतियोगिता आयोजना गर्न लागेको जनाएको छ ।