काठमाडौं । राष्ट्रिय पुरुष फुटबल टिमका व्यवस्थापक मधुशुदन उपाध्यायले खेलाडीलाई प्राथमिकतामा राखेर मात्रै कर्मचारीको तलब वृद्धि गर्नुपर्ने बताएका छन् ।
अखिल नेपाल फुटबल संघ (एन्फा)का केन्द्रिय सदस्य समेत रहेका उपाध्यायले खेलाडीलाई प्राथमिकतामा राखेर तलब वृद्धि गरेपछि मात्रै कर्मचारीको बिषय अघि बढाउनुपर्ने बताएका हुन् ।
खेलपाटीसँग बोल्दै उनले भने, ‘पहिला खेलाडीको हकमा तलब बढ्नुपर्छ । खेलाडीको तलब नबढेको निकै समय भैसकेको छ ।’
उनले राष्ट्रका लागि खेल्ने खेलाडीको तलबमा वृद्धि नगरेर कर्मचारीको प्रक्रिया अघि बढाउँदा बाहिर राम्रो सन्देश नजाने र सो बिषय उपयुक्त समेत नहुने उल्लेख गरे ।
‘पहिला खेलाडीकोनै तलब नबढाई कर्मचारीको बढाउँदा बाहिर नराम्रो छाप जान्छ । उपयुक्त पनि हुँदैन । पहिलो चरणमा तबल वृद्धि हुँदा खेलाडीलाई प्राथमिकतामा राख्नुपर्छ ।’ उनले भने ।
एन्फाका तत्कालिन अध्यक्ष गणेश थापाले ५२ सालमा एन्फा अध्यक्षमा निर्वाचित भएपछि खेलाडीलाई तबल दिन सुरुवात गरेका हुन् ।
उनले सुरुवाती चरणमा १५ सयबाट तलब सुरु गरेर आफ्नै कार्यकालमा १५ हजार सम्म पुर्याएका थिए ।
भ्रष्टाचारको आरोपमा थापा फिफाबाट प्रतिबन्धमा परेपछि एन्फाको नेतृत्वमा नरेन्द्र श्रेष्ठ हुँदै कर्माछिरिङ शेर्पा आईपुगेका छन् । तर लामो समय बितिसक्दा समेत खेलाडीको तलब बढ्न सकेको छैन ।
हाल पुरुष खेलाडीले एन्फाबाट मासिक १५ हजार र महिला खेलाडीले ७ हजार रुपैयाँ पारिश्रमिक पाउँदै आएका छन् ।
भर्खरैमात्र कर्मचारी नियमाबली आएसँगै एन्फाले आफ्ना कर्मचारीको तलब बढाउने तयारी गरिरहेको छ । नियमावली कार्यान्वयनमा नआउँदा कर्मचारीले साउन यताको तलब समेत पाएका छ्रैनन् ।
केहि समयअघि आएको कर्मचारी नियमावलीले विगतमा स्थायी रुपमा रहँदै आएका कर्मचारीले अब करारका आधारमा काम गर्नुपर्ने भएको छ ।
एसियाली फुटबल महासंघ एएफसीले कर्मचारीलाई ‘बेसिक’ पारिश्रमीक दिएर राख्नुपर्ने प्रस्ताब अगाडी सारेसंगै एन्फाले समेत आफ्ना कर्मचारीलाई करारमा राख्ने निर्णय गरेको हो । सामान्यतया कर्मचारीसंग एन्फाले ६ महिनादेखि २ बर्षसम्म सम्झौता गर्नेछ । तर विगत लामो समयदेखि एन्फामा कार्यरत कर्मचारीले उपदान पाउनुपर्ने माग राखेपछि कर्मचारी नियमाबली विबादमा आएको थियो ।
हाल एन्फाका १७ सदस्य निर्वाचित कार्यसमिति सदस्य बाहेक अन्य सबै कर्मचारीले सञ्चयकोष सहित तलबमा रहेका छन् । एन्फा कार्यसमितिबाट महासविच, कोषाध्यक्ष र मानार्थ सदस्यले तबल लिने परम्परा रहेकोे छ ।
हाल कर्मचारीको मात्रै तलब बढ्ने भएपछि खेलाडीसमेत आफुहरुको तबल बढाउनुपर्ने माग राख्दै आएका छन् । यस्तै, महिला–पुरुष तलब बराबर गराउने माग समेत बढ्दै गएको छ ।
एन्फा कार्यसमिति सदस्य समेत रहेका उपाध्यायले महिला पुरुषको तलब बराबर गर्नुपर्ने मत राख्दै आएका छन् ।
‘बाहिरका अधिकांश मुलुकमा महिला पुरुषको तलब समान हुन थालिसकेको छ । हामीले पनि त्यसलाई कार्यान्वयन गराउनुपर्छ । पुरुषले जति पाउँछन्, महिलाले पनि समान पाउनुपर्छ । एन्फाले यस बिषयमा निर्णय गर्नुपर्छ ।’ उपाध्यायले भने ।
उनले कर्मचारीको समेत योग्यता र कार्यक्षमता लगायत विवरण हेरेर मात्र तलब वृद्धि गर्नुपर्ने बताए ।
‘एन्फाको कर्मचारी नियमाबली अनुसार अब करारमा राख्दा कर्मचारीको कार्यक्षमता, योग्यता, जिम्मेवारी, पद अनुसारको तलब पाउनुपर्छ । तर खेलाडीको तलब नबढेर कर्मचारीको बढ्दैन ।’ उपाध्यायले भने ।
