युनाइटेड र क्रिस्टल तथा आर्सनल र वेस्ट ह्याम भिड्दै

एजेन्सी । इंग्लिस प्रिमियर लिग फुटबलमा आज (शनिबार) राति विभिन्न ४ खेल हुदैछ ।

अघिल्लो हप्ता सफल सुरुवात गरेको एभर्टनले वेस्ट ब्रुम, लिड्सले फुलहम, म्यानचेस्टर युनाइटेडले क्रिस्टल प्यालेस र आर्सनलले वेस्ट हामसँग प्रतिस्पर्धा गर्दैछन् ।

युनाइटेड घरेलु मैदान ओल्ड ट्राफोर्डमा क्रिस्टल प्यालेससँग खेल्दै नयाँ सिजनको सुरुवात गर्दैछ । युनाइटेडले यसै समर ट्रान्सफरमा अनुबन्धन गरेका डोनी भान डी विकले शनिबार डेब्यु गर्ने सम्भावना छ ।

क्वारेन्टिनको समय पुरा गरि पाउल पोग्बा र मासन ग्रिनउड युनाईटेडको टिममा उपलब्ध हुनेछन् । लिगको पहिलो खेलमा जित निकालेको क्रिस्टल प्यालेससँग भने चोटग्रस्त खेलाडीको सूची लामो छ । उसका ग्यारी काहिल, जेम्स टोमकिन्स र प्याट्रिक भान अन्होल्ट चोटबाट सताईएका छन् ।

अर्को खेलमा लण्डनको आर्सनल लगातार दोस्रो खेलमा जित निकाल्ने लक्ष्य सहित वेस्ट ह्यामलाई घरेलु मैदानमा आतिथ्यता प्रदान गर्दैछ । फुलहमविरुद्ध शानदार जित सहित लिगको सुरुवात गरेको आर्सनलका डेभिड लुइज फिट देखिएका छन् ।

अघिल्लो खेलमा टिम बाहिर रहेका मेसुट ओजिललाई खेलाउने विषयमा प्रशिक्षक मिकेल अर्टेटाले विचार गर्न सक्नेछन् । क्लबमा सबैभन्दा बढी तलब दिने गरि सम्झौता गरेका पेरिक एम्रिक औवामियाङ र चेल्सीबाट लण्डन सरेका ब्राजिली मिडफिल्डर विलियन प्रर्दशनमा धेरैको नजर रहनेछ । गत हप्ता आर्सनलले निकालेको जित विलियनकै वरपर देखिन्थ्यो ।

यता वेस्ट ह्यामका कप्तान मार्क नोबिल चोटका कारण शुक्रबारको प्रशिक्षणमा सहभागी भएनन् । उनको चोटलाई निगरानीमा राखिएको छ । आर्सनलका पूर्व मिडफिल्डर ज्याक विल्सेरे चोटकै कारण पूर्व क्लबबिरुद्ध मैदान उत्रनेमा आशंका छ ।

आजै राति हुने अन्य खेलमा एभर्टनले वेस्ट ब्रुम र लिड्सले फुलहमलाई घरेलु मैदानमा आतिथ्यता प्रदान गर्दैछन् ।