ला लिगा : सिजनको पहिलो खेल बराबरी

एजेन्सी । स्पेनिस ला लिगा फुटबल अन्तर्गत नयाँ सिजनको पहिलो खेल बराबरीमा सकिएको छ ।

शनिबार राति सेल्टा भिगो र आइबरबीच भएको पहिलो खेल गोलरहित बराबरीमा सकिएको हो ।

आइबरको घरेलु मैदानमा भएको खेलमा दुबै टिमले पाएको अवसर खेर फाल्दा खेल गोलरहित बराबरीमा सकिएको हो ।

बल पोजिसनमा घरेलु टिमले पकड बनाएको थियो । तर, आइबरको आधा दर्जन बढी पोस्ट आक्रमण सेल्टाका गोलकिपर र डिफेन्सले विफल बनाईदिएका थिए ।

सेल्टाले पनि आइबरविरुद्ध केहि राम्रो अवसर बनाएको थियो । तर, सेल्टा त्यसलाई सदुपयोग गर्न असफल भएको थियो ।

यस्तै खेलको ८७ औं मिनेटमा पापे कौलीले दोहोरो पहेलो कार्डसहित रातो कार्ड पाउँदा आइबर १० खेलाडीमा समेटिएको थियो ।

बराबरीसँगै दुबै टिमले एक एक अंक बाडेका छन् । तालिकामा सेल्टा शीर्ष र आइबर दोस्रो स्थानमा रहेका छन् ।