बेकह्यामको क्लब मियामीसँग सम्झौता गर्दै हिगुईन

एजेन्सी । इटालियन क्लब युभेन्ट्सका फरवार्ड गोन्जालो हिगुईन अमेरिकी मेजर लिग सकर (एमएलएस) क्लब इन्टर मियामीमा अनुबन्धित हुने भएका छन् ।

अर्जेन्टिनाका हिगुईन अनुबन्धका लागि मियामी र युभेन्ट्सबीच सहमति भएको स्काई इटालीले जनाएको छ ।

मियामीसँगको सम्झौताका लागि हिगुईन अमेरिकाको फ्लोरिडा पुगिसकेका छन् ।

युभेन्ट्सले बार्सिलोनाका फरवार्ड लुइस स्वारेज अनुबन्ध गर्ने भएपछि हिगुईनले क्लब छाड्ने निर्णय गरेका हुन् । 

३२ वर्षीय हिगुईनले चार सिजन युभेन्ट्समा बिताएर मियामी जान लागेका हुन् ।

सन् २०१६ मा नापोलीबाट युभेन्ट्स आएका उनले १ सय ४९ खेलमा ६६ गोल गरेका छन् ।

रियल मड्रिडका पूर्व खेलाडी समेत रहेका हिगुईनले युभेन्ट्सबाट ३ सिजन सिरी ए र दुई पटक कोपा इटालिया जितेका छन् ।

इंग्ल्यान्डका पूर्व स्टार डेभिड बेकह्यामको क्लब मियामीले यस अघि युभेन्ट्सकै मिडफिल्डर ब्लेस माटुइडीलाई अनुबन्ध गरेको थियो ।