न्युकासलसँग हेडनको नयाँ सम्झौता

एजेन्सी । इंग्लिस प्रिमियर लिग क्लब न्युकासल युनाइटेडसँग मिडफिल्डर आइज्याक हेडनले नयाँ सम्झौता गरेका छन् ।

इंग्लिस मिडफिल्डर हेडनले न्युकासलसँग थप ६ वर्ष क्लबमा रहने गरी सम्झौता गरेका हुन् ।

सम्झौतासँगै हेडन सन् २०२६ सम्म न्युकासलमा रहने छन् ।

२४ वर्षीय मिडफिल्डर सन् २०१६ मा आर्सनलबाट न्युकासल आएका थिए । न्युकासल आउनु अघि उनले एक सिजन हल सिटीबाट लोनमा खेलेका थिए ।

हेडनले न्युकासलका लागि १ सय बढी खेल खेलेका छन् । गत सिजन २९ प्रिमियर लिग खेलमा १ गोल गरेका थिए ।

यस्तै न्युकासलले गोलकिपर कार्ल डार्लोसँग पनि नयाँ सम्झौता गरेको छ ।

कार्लोले न्युकासलसँग थप पाँच वर्ष क्लबमा रहने गरी सम्झौता गरेका छन् ।

नयाँ सम्झौता अनुसार कार्ल सन् २०२५ सम्म न्युकासलमा रहने छन् ।