काठमाडौं । चेल्सीले समर ट्रान्सफरमा अनुबन्धन गरेका ३ नयाँ खेलाडीले प्रिमियर लिगको पहिलो खेल गुमाउने भएका छन् ।
प्रशिक्षक फ्राङ्क लाम्पार्डले तीन नयाँ खेलाडीले ब्राइटोनबिरुद्धको खेल गुमाउने भएको बताएका छन् ।
चेल्सीले सोमबार ब्राइटोनबिरुद्ध खेल्दै प्रिमियर लिगको नयाँ सिनजको सुरुवात गर्दैछ ।
हाकिम जियाच सहित थिएगो सिल्भा र वेन चिलवेल ब्राइटोन भ्रमणमा अनुपस्थित रहने छन् ।
चेल्सीले यस समर ट्रान्सफरमा झण्डै २ सय मिलियन पाउण्ड खर्च गरेको छ । प्रिमियर लिगको उपाधिमा चुनौती दिन चेल्सीले नयाँ सिजनका लागि ठुलो रकम खर्च गरेको हो । चेल्सीका धेरै प्रशंसक नयाँ खेलाडीको डेब्यु हेर्न आतुर छन् ।
प्रशिक्षक फ्राङ्क लाम्पार्डले डेब्युका लागि केही खेलाडीले प्रतिक्षा गर्नुपर्ने बताए ।
‘जियाचले चोट बोकेका छन् । उनी फिट छैनन् । हामी उनीमा काम गरिरहेका छौ । उनी हप्ता दिनमा निको हुनेछन् ।’ उनले भने ।
जियाचले प्रि–सिजनको मैत्रीपूर्ण खेलमा चोट बोकेका थिए । डिफेन्डर बेन चिलवेल समेत पूर्ण रुपमा फिट छैनन् । डिएगो सिल्भाले समेत भर्खरैमात्र अभ्यास सुरु गरेका छन् ।
‘बेन चिलवेलको फिटनेशका लागि हामीले काम गरिरहेका छौ । तर उनी सोमबारसम्म फिट हुने छैनन् । उनले सुधार गरिरहेका छन्, जो हाम्रा लागि राम्रो हो । सिल्भा लण्डनमा छन्, तर ट्रेनिङमा थिएनन् । उनले डेब्यु गर्ने बिषयमा आशंका छ ।’ लाम्पार्डले भने ।
लाम्पार्डसंग नयाँ सिजन सुरु गर्दा दुई मुख्य डिफेन्डर रहने छैनन् । उनले क्रिस्टियन पुलिसिक र सिजर अजेपिलिकुएटा आफुसंग उपलब्ध हुने बताए । दुवैले पछिल्लो महिना आर्सनलबिरुद्ध एफ ए कपको फाइनलमा चोट बोकेका थिए ।
उनले आफुसंग सेन्टर ब्याक फिकायो तोमोरी उपलब्ध हुने बताएका छन् । उनी पछिल्लो समय एभर्टन जाने चर्चा थियो ।
२२ बर्षिया खेलाडीलाई लाम्पार्डले गत सिजन मौका दिएका थिए । उनले राम्रो प्रर्दशन समेत गरेका थिए । तर अन्तिम समयमा उनले टिमबाट स्थान गुमाएका छन् ।
नयाँ सिजनका लागि ठुलो रकम खर्च गरेको चेल्सीका लागि राम्रो नतिजा निकाल्नुपर्ने दबाब रहेको छ ।
चेल्सीले काइ हभार्ट्जलाई बायर लिभरकुशनबाट ८९ मिलियन र आरबी लाइपेजिगबाट टिमो वार्नरले ५३ मिलियन पाउण्डमा अनुबन्धन गरेको छ ।
तर लाम्पार्डले यस बिषयमा आफुलाई बोल्न आवश्यक नरहेको बताएका छन् । उनले कुनै ब्यवसाय नगरेपनि चेल्सीमाथि राम्रो नतिजा निकाल्न सधै दबाब हुने बताएका छन् ।
