पुलिसिकलाई १० नम्बरको जर्सी

एजेन्सी । चेल्सी फरवार्ड क्रिस्टियन पुलिसिकलाई १० नम्बरको जर्सी दिईएको छ ।

नयाँ सिजनका लागि चेल्सीले फरवार्ड पुलिसिकलाई १० नम्बरको जर्सी दिएको हो ।

सन् २०१९ मा बोरुसिया डर्टमण्डबाट ६४ मिलियन पाउण्डमा चेल्सी आएका पुलिसिकले पहिलो सिजन सफल रुपमा बिताए ।

अमेरिकी फरवार्ड पुलिसिकले सबै प्रतियोगिता ११ गोल गर्नुका साथै १० गोलको अवसर सिर्जना गरे । गत सिजनको उत्कृष्ट प्रर्दशनले उनी प्रिमियर लिगको युवा खेलाडीको अवार्डबाट सम्मानित समेत भएका छन् ।

चेल्सीमा १० नम्बर जर्सीलाई महत्वका साथ हेरिन्छ । सो जर्सी चेल्सीमा यसअघि जो कोल, इडेन हजार्ड र विलियनले लगाउने गरेका थिए । सबै खेलाडीले प्रिमियर लिग सहित युरोपेली प्रतियोगिताहरु क्लबबाट जितेका थिए ।

गत सिजन विलियनले १० नम्बरको जर्सी प्राप्त गरेका थिए । तर उनले नयाँ सिजन चेल्सी छाड्दै अर्को लण्डन क्लब आर्सनल गएका छन् ।

पुलिसिककै शानदार प्रर्दशनमा चेल्सीले चौथौं स्थानमा रहदै गत सिजन लिगको अन्त्य गरेको थियो । उनले एफ ए कपको फाइनलमा आर्सनलसंग पराजित बनेको खेलमा समेत गोल गरेका थिए ।

१० नम्बरको जर्सी दिएसंगै पुलिसिक र हजार्डबीच धेरै तुलना हुने आँकलन गरिएको छ । तर अमेरिकन फरवार्डले चेल्सीमा आफ्नै इतिहास लेख्न चाहेको बताएका छन् ।
ह्जार्डको बिषयमा उनले गत सिजन भनेका थिए, ‘उनी अविश्वसनीय खेलाडी हुन् । यो सबै स्पष्ट, उनले यस क्लबमा के के गरेका छन् । त्यसैले मैले आफुलाई तुलना गर्ने कोशिश गरेको छैन ।’

‘मेरा लागि अहिले खेल जित्नु महत्वपूर्ण कुरा हो । र टिममा प्रभाव पार्नु मुख्य कुरा हो । म धेरै खुसी छु, भर्खरै मात्र मैले यसो गरेको छु । मेरो शैली सधै आक्रमक र रचनात्मक किसिमको रहेको छ ।’ उनले भने ।

प्रिमियर लिगमा प्रभाव पार्ने लक्ष्य सहित चेल्सीले यस समर ट्रान्सफरमा ठुलो रकम खर्च गरेको छ । उसले टिमो वार्नर सहित काइ हाभर्ट्ज, वेन चिलवेल, हाकिम जियाच र थिएगो सिल्भालाई अनुबन्धन गरेको छ ।

फ्राङ्क लम्पार्ड नेतृत्वको चेल्सीले सोमबार ब्राइटोनसंग खेल्दै प्रिमियर लिगको नयाँ सिजन सुरुवात गर्नेछ ।