पीएसजीको हारमा मार्सेलीमा उत्सव !

एजेन्सी । कुनैपनि खेलमा टिम या खेलाडीको हार हुँदा समर्थकहरु उत्सव मनाउदैनन् ।

तर, फ्रान्सको शहर मार्सेलीमा भने फ्रेन्च क्लब पराजित हुँदा उत्सव मनाईएको छ ।

पोर्चुगलको लिस्बनमा आइतबार राति च्याम्पियन्स लिगको फाइनलमा पेरिस सेन्ट जर्मेन (पीएसजी) पराजित भयो ।

जर्मन क्लब बायर्न म्युनिखसँग पीएसजी १-० ले पराजित हुँदै उपाधिबाट बन्चित भएको थियो ।

पीएसजीको हारसँगै मार्सेली शहरमा उपाधि जितेको जस्तै उत्सव भएको थियो ।

पीएसजीको हारमा उत्सव मनाउने थिए, फ्रेन्च क्लब ओलम्पिक डी मार्सेलीका समर्थक ।

फ्रेन्च लिग वानका प्रतिद्वन्दी क्लब पीएसजी पराजित भएपछि मार्सेली समर्थक खुशीले उत्सव मनाएका हुन् ।

उनीहरु उत्सव मनाउन सडककै निस्किएका थिए । र, आतिशबाजी गरेका थिए । पीएसजीविरुद्ध नाराबाजी गरेका थिए ।

मार्सेली समर्थकहरु पीएसजीलाई सबैभन्दा बढी घृणा गर्छन् । केहि दिन अघि मार्सेलीका समर्थकले पीएसजीका समर्थकलाई आक्रमण समेत गरेका थिए ।

दुई क्लबका समर्थकबीच हिंसात्मक गतिविधि भएपछि मार्सेलीमा पीएसजीको जर्सी प्रयोग गर्न प्रतिबन्ध समेत गरिएको थियो ।

तर, चौतर्फी विरोध भएपछि प्रहरीले प्रतिबन्ध फिर्ता लिएको थियो ।