भारत पुगेका अभिषेकको कोरोना रिपोर्ट नेगेटिभ

काठमाडौं । भारतको दोस्रो डिभिजन लिग खेल्न कोलकत्ता पुगेका अभिषेक रिजालको कोरोना रिपोर्ट नेगेटिभ आएको छ ।

कोलकत्ता पुगेपछि गरिएको कोरोना परिक्षणमा अभिषेकको रिपोर्ट नेगेटिभ आएको हो ।

कोलकत्ता पुगेपछि शनिबार अभिषेकको स्वाब लिईएको थियो । उक्त स्वाबको रिपोर्ट नगेटिभ आएको अभिषेकले खेलपाटीलाई जानकारी गराए ।

‘यहाँ आएलगत्तै पीसीआर लिएको थिए । रिपोर्ट नगेटिभ आएको छ,’ उनले भने ।

राष्ट्रिय फुटबल टिमका युवा स्ट्राइकर अभिषेक गत बुधबार भारत गएका थिए । स्थलमार्ग हुँदै भारत गएका अभिषेक कोलकत्ता भने प्लेनमा गएका थिए ।

अभिषेकले गत बुधबार मोहम्मेदन स्पोर्टिङ क्लबसँग तीन वर्षको सम्झौता गरेका थिए । सम्झौता रकम भने खुलाईएको छैन ।

सम्झौता अनुसार क्लब शीर्ष डिभिजनमा उक्लिएको खण्डमा उनले सोहि क्लबमा तीन वर्ष बिताउने छन् । क्लबको बढुवा नभएको खण्डमा भने क्लबले आवश्यकता अनुसार उनलाई रिलिज गर्ने बताईएको छ ।

भारतीय फुटबल फेडेरेसनले कोरोनाको महामारीकाबीच रोकिएको लिग पुनः सुचारु गर्ने तयारी गरेको छ । मिति भने तय भैसकेको छैन ।

यद्यपि मोहम्मेदनले मंगलबारबाट अभ्यास सुरु गर्ने अभिषेकले बताए ।

‘मंगलबारबाट तयारी गर्ने बताईएको छ,’ माल्दिभ्सको दोस्रो डिभिजन लिग खेलिसकेका अभिषेकले भने ।

क्लबले अभिषेकले प्रयोग गर्ने जर्सी नम्बर खुलााईएको छैन । तर, क्लबले अभिषेकलाई नेप्लिज रोनाल्डोको उपमा दिइसकेको छ ।

नेपाल राष्ट्रिय टिमबाट प्रतिनिधित्व गरिसकेका युवा खेलाडीसँगै मोहम्मेदनले भारतीय उमेर समूहबाट खेलिसकेका खेलाडीलाई प्राथमिकतामा राखेको छ ।

उसले यू-१७ विश्वकप खेलेका अन्वार अलिसँगै सुरज रावत, नेपालमै आयोजना भएको साफ यू-१८ विजेता टिमका हिमांशु जाग्रा,बालभिन्द्र सिंह, जस्किरानप्रित सिंहजस्ता खेलाडीलाई टिममा समावेश गराएको छ ।

यस्तै क्लबले मुख्य प्रशिक्षकमा पञ्जाबका पूर्व प्रशिक्षक यान ललाई झिकाएको छ । उनि भारतीय 'ए' लाईसेन्स प्राप्त प्रशिक्षक हुन् ।

सन् १८९१ मा स्थापित यस क्लब पहिलो पटक शीर्ष डिभिजनमा बढुवा हुने योजनामा रहेको छ । सोहि अनुसार उसले ठुलो लगानी गरेको छ ।

कोरोनाको कारण लिग स्थगित हुनु अघि मोहम्मेदनले ६ खेलबाट १२ अंक जोडेको छ । २ खेलमा पराजित मोहम्मेदन शीर्ष स्थानमा रहेको छ ।