बार्सिलोनाका एक खेलाडीमा कोरोना

एजेन्सी । बार्सिलोनाका एक खेलाडीमा कोरोनाको संक्रमण पुष्टि भएको छ ।

च्याम्पियन्स लिगको क्वार्टरफाईनल खेलको तयारीमा रहेको बार्सिलोनाका एक खेलाडीमा कोरोनाको संक्रमण देखिएको हो ।

स्पेनिस महारथी क्लब बार्सिलोनाले आगामी शुक्रबार जर्मन क्लब बायर्न म्युखिनसंग प्रतिस्पर्धा गर्दैछ ।

बार्सिलोनाको सिनियर टिमका खेलाडी बायर्न म्युनिखबिरुद्धको तयारीमा रहेका छन् । अभ्यासमा रहेका एक जना खेलाडीमा कोरोनाको संक्रमण देखिएको बार्सिलोनाले जनाएको छ ।

बार्सिलोनाले संक्रमित खेलाडीको परिचय खुलाएको छैन । उनी बिहिबार पोर्चुगलको लिस्बोनको भ्रमण गर्ने छैनन् ।

‘मंगलबार ९ खेलाडीको समूहमा गरिएको पीसीआर परिक्षणमा एक खेलाडीलाई कोरोना संक्रमण देखिएको छ ।’ क्लबले बिज्ञप्तीमार्फत जनाएको छ ।

‘खेलाडीमा कुनै लक्षण देखिएको छैन । उनको स्वास्थ्य राम्रो छ । उनी घरमा एकान्तवासमा रहेका छन् ।’ क्लबले भनेको छ ।

‘पछिल्लो घटनाको बिषयमा स्वास्थ्य र खेल अधिकारीलाई रिपोर्ट गरिएको छ ।’ बार्सिलोनाले भनेको छ, ‘खेलाडीसंग सम्पर्कमा रहेका सबै खेलाडीको पीसीआर परिक्षण गरिएको छ ।’

संक्रमित खेलाडीसंग सम्पर्कमा देखिएका अन्य कुनै सिनियर खेलाडीमा कोरोना देखिएको छैन । जो बिहिबार पोर्चुगलको लिस्बोनको यात्रामा निस्कदैछन् ।

स्पेनमा ३ लाख ७३ हजार ६ सय ९२ जनामा कोरोनाको संक्रमण देखिएको छ । जसमा २८ हजार ५ सय ८१ जनाको मृत्यु भएको छ ।

मंगलबार फ्रान्सेली क्लब पीएसजीले समेत अभ्यास मैदानमा कोरोना संक्रमण देखिएको बताएको थियो । पीएसजीले क्वार्टरफाईनलको खेलमा ईटालियन क्लब एटलान्टासंग प्रतिस्पर्धा गर्दैछ ।