किरण अर्थोप्लास्टको 'ब्राण्ड एम्बास्डर'

काठमाडौं । राष्ट्रिय फुटबल टिमका कप्तान किरण चेम्जोङलाई अर्थोप्लास्ट रिह्याब सेन्टरले ब्राण्ड एम्बास्डर बनाएको छ ।

शनिबार ललितपुरको ग्वार्कोमा आफ्नै भवनमा सेन्टरले एक कार्यक्रमको आयोजना गरेर किरणलाई ब्राण्ड एम्बास्डर घोषित गरेको हो ।

सेन्टरका प्रबन्ध निर्देशक हरिकुमार तामाङ र कप्तान चेम्जोङले सम्झौता पत्रमा हस्ताक्षर गरेका थिए ।

सम्झौता अनुसार अथोप्लाष्टबाट किरण र उनका परिवारलाई दुई लाख रुपैयाँ बराबरको सेवा सुविधा उपलब्ध हुनेछ ।

त्यस्तै, ल्याव सेवामा ५० प्रतिशत सुविधा दिनेछ ।

सेन्टरले अन्तराष्ट्रिय जगतमा देशलाई चिनाउन योगदान दिने कुनैपनि विधाका राष्ट्रिय खेलाडीलाई सेवामा ४० प्रतिशत छुटको ब्यवस्था गरेको छ । यस्तै, जुनसुकै खेलसंग सम्बन्धित खेलाडीलाई संस्थाले ३० प्रशित छुटको ब्यवस्था गरेको जानकारी दिईएको छ ।

खेलाडीका लागि रिह्याबिलिटेसन सेन्टर नहुँदा खेल तथा अभ्यासको क्रममा घाईते भएका खेलाडीलाई सेवा पुर्याउने उद्धेश्यले संस्थाको स्थापना गरिएको सेन्टरले जनाएको छ ।

ब्राण्ड एम्बास्डर चुनिएका कप्तान किरणले खेलाडीलाई चोटपछि मैदान फर्कन पुर्नस्थापना केन्द्र नहुँदा धेरै समस्या पर्ने गरेको उल्लेख गर्दै सेन्टरको स्थापनाले चोट बोकेका खेलाडीलाई सहयोग पुग्ने बताए ।

पूर्व कप्तान तथा एन्फाका उपाध्यक्ष उपेन्द्रमान सिंहले चोटको उपचार र पुर्नस्थापना नहुँदा धेरै राम्रा खेलाडीलाई फुटबलले गुमाएको उल्लेख गर्दै सेन्टरको स्थापनाले घरेलु खेलकुदलाई ठुलो सहयोग पुर्याउने बताए ।

सेन्टरका ईन्चार्ज सुरज भुसालले खेलाडीको उपचार र पुर्नस्थापनामा देखिएको समस्यालाई केन्द्रमा राखेर पहिलो पटक स्पोर्ट्स रिह्याब सेन्टर सुरु गर्न लागिएकाे जानकारी दिए ।

उनले खेलाडीका लागि पुर्नस्थापना केन्द्र अति आवश्यक रहेको उल्लेख गर्दै अझ धेरै रिह्याब सेन्टर खोलिनुपर्नेमा जोड दिए ।

संस्थाले खेल्ने क्रममा घाईते भएका खेलाडीको शल्यक्रिया, फिजियो सहित विशिष्टकृत सेवाहरु प्रदान गरिरहेको छ ।