इन्टर घरेलु मैदानमा पराजित

एजेन्सी । इटालियन सिरी 'ए' फुटबलमा इन्टर मिलान पराजित भएको छ ।

आइतबार राति भएको खेलमा इन्टर बोलोग्नासँग २-१ गोल अन्तरले पराजित भएको हो ।

घरेलु मैदानमा सुरुवाती अग्रता जोगाउन नसक्दा इन्टर पराजित भएको हो ।

खेलको २२ औं मिनेटमा रोमेलु लुकाकुले गोल गर्दै इन्टरलाई अग्रता दिलाएका थिए ।

५७ औं मिनेटमा रोबर्टो सोरीअनोले रातो कार्ड पाउदा बोलोग्ना १० खेलाडीमा समेटियो ।

६२ औं मिनेटमा इन्टरका लाउटरो मार्टिनेजले पेनाल्टीमा गोल गर्न सकेनन् ।

खेलको ७४ औं मिनेटमा मुसा जुवाराले गोल गर्दै बोलोग्नालाई १-१ गोलको बराबरीमा ल्याए ।

७७ औं मिनेटमा एलेसान्द्रो बास्टोनीले दोहोरो पहेलो कार्डसहित रातो कार्ड पाउँदा घरेलु टिम पनि १० खेलाडीमा समेटियो ।

त्यसपछि खेलको ८० औं मिनेटमा जुवाराले व्यक्तिगत दोस्रो गोल गर्दा बोलोग्ना २-१ ले विजयी भयो ।

घरेलु मैदानमा पराजित भएसँगै तेस्रो स्थानको इन्टरले ३० खेलमा ६४ अंक जोडेको छ ।

बोलोग्ना ४१ अंकसहित नवौं स्थानमा रहेको छ ।