रियललाई बिल्बाओ र बार्सिलोनालाई भियाको चुनौती

एजेन्सी । स्पेनिस ला लिगा फुटबलमा आज (आइतबार) विभिन्न चार खेल हुँदैछ ।

ला लिगामा आइतबार उपाधि दाबेदार रियल मड्रिड, बार्सिलोना लगायतका क्लबले प्रतिस्पर्धा गर्नेछन् ।

लिग लिडर रियलले बलियो टिम एथ्लेटिक बिल्बाओसँग खेल्ने छ ।

बिल्बाओको मैदानमा हुने खेल नेपाली समय अनुसार ५:४५ बजे सुरु हुनेछ ।

बिल्बाओविरुद्ध मैदान उत्रदा रियल जित निकाल्दै उपाधि होड बलियो बनाउने योजनामा हुनेछ ।

तर, बलियो र घरेलु टिमविरुद्ध रियललाई जित निकाल्न कठिन हुने देखिएको छ ।

रियलले ३३ खेलमा ७४ अंक जोडेको छ । र, रियल दोस्रो स्थानको बार्सिलोना भन्दा ४ अंकले अघि रहेको छ ।

बिल्बाओको मैदानमा जित निकाल्दै उक्त अग्रतालाई कायम राख्ने योजनामा हुनेछ ।

४८ अंकसहित आठौं स्थानमा रहेको बिल्बाओ भने रियललाई हराएर अंक तालिका सुधार गर्न चाहन्छ ।

यस्तै बार्सिलोनाले भिया रियलसँग उसैको मैदानमा खेल्नेछ । दुई टोलीबीचको खेल राति १:४५ बजे सुरु हुनेछ ।

बार्सिलोना घरेलु टोलीलाई हराएर उपाधि होड कायम राख्न चाहन्छ । यस्तै रियलसँगको अंक दुरी समेत कम गर्न चाहन्छ ।

बार्सिलोनाले ३३ खेलमा ७० अंक जोडेको छ । भिया ५४ अंक जोडेर पाँचौं स्थानमा रहेको छ ।

ला लिगा अन्तर्गत नै स्पानियोलले लेगानेससँग खेल्नेछ । ओसासुनाले गेटाफेको सामना गर्नेछ ।