अनिश भट्टराई
पोखरा । विश्वव्यापी महामारीका रुपमा देखिएको कोरोना भाईरसको संक्रमण फैलन नदिन देश पछिल्लो एक महिनादेखि लकडाउनमा छ ।
घर बाहिर समेत निस्कन नपाएपछि सबै क्षेत्र प्रभावित छ । खेलकुद जगतले पनि हलचल गर्न पाएको छैन, एक हिसाबमा लकडाउनकै अवस्थामा छ । खेलाडीको दैनिकी र प्रतियोगिताको तालिका प्रभावित बनेका छन् ।
आपतकालिन रुपमा देशमा लकडाउन लागु हुदाँ अन्तिम चरणमा पुगेका प्रतियोगिता रोक्नु पर्यो। चर्चित फ्रेन्चाइज क्रिकेट लिग एभरेष्ट प्रिमिएर लिग (इपीएल) स्थगित बन्यो । बी डिभिजन लिग फुटबल बिचैमा रोकियो ।
लकडाउनका कारण प्रतियोगिता रोकिदा खेलाडी मारमा परेका छन् । खेलाडीलाई शारीरिक तन्दुरुस्ती कायम गर्न समेत समस्या परेको छ । खेलाडीलाई आफ्नो लय गुम्ने चिन्ता थपिएको छ ।
यही डर राष्ट्रिय क्रिकेट टिमका खेलाडी शेर मल्ललाई पनि छ । लकडाउन खुलेको केही समयको अन्तरालमा मात्र प्रतियोगिताहरु सञ्चालन गर्नुपर्ने उनी बताउँछन् ।
शारीरिक तन्दुरुस्ती कायम राख्न आवश्यक सामाग्री सबै खेलाडीसँग नहुदाँ लकडाउन खुले लगत्तै लयमा आउन गाह्रो हुने उनी बताउँछन् ।
‘अहिले खेलाडी सबै खेलबाट टाढा छौँ । सबैसंग फिटनेसका लागि आवश्यक पर्ने सामग्री नभएको हुन सक्छ ।’ मल्लले खेलपाटीसँग भने, ‘त्यसैले लकडाउनको अवस्थामा पूर्ण रुपमा फिट भईदैन । धेरै समय खेलबाट टाढा रहेको अवस्थामा सबैलाई गति कायम गर्न गाह्रो पर्छ ।’
मल्लले कोरोनाका कारण पूर्वनिर्धारित प्रतियोगिता स्थगित हुदाँ खेलाडीको करियरमै क्षति पुग्ने उल्लेख गर्छन् ।
घरेलु प्रतियोगिताले राष्ट्रिय टिमको ढोका खोल्न मद्धत पुग्ने भएकाले लकडाउनले अवरोध सिर्जना गर्ने उनको बुझाई छ ।
‘घरेलु प्रतियोगितामा राम्रो प्रदर्शन गर्दै राष्ट्रिय टिममा पर्ने सबै खेलाडीको लक्ष्य हुन्छ । कोरोनाले प्रतियोगिता हुन पाएन । खेलाडीको करियरमा धक्का लाग्न सक्छ ।’ उनले भने ।
उनले लकडाउनको समयमा दिन बिताउन सकस भईरहेको बताउँछन् ।
‘दिन कसरी बिताउने भन्ने चिन्ता छ ।’ उनले सुनाए ।
यु–१९ टिमका अर्का महत्वपूर्ण सदस्य सागर ढकाल कोरोनाको प्रकोप चाँडै सकिएर क्रिकेट पुर्ववत अवस्थामा फर्कनेमा आशावादी छन् ।
‘क्रिकेट नखेलेर बस्दा दिक्कै लाग्न थालिसक्यो । छिट्टै कोरोनाको कहर सुल्झिएर क्रिकेटका गतिविधि सुरु भए हुन्थ्यो जस्तो लागेको छ ।’ उनले भने ।
आफुलाई फिट राख्न घरमै सामान्य अभ्यास गरेको उनले बताए ।
इपीएल जस्ता प्रतियोगिता स्थगित हुदाँ खेलाडीको मनोबलमा कमी आएको उनी सुनाउँछन् । कोरोनाको प्रकोप सकिने बित्तिकै धेरै प्रतियोगिताको आयोजना गर्नुपर्ने ढकाल सुझाव दिन्छन् ।
‘फ्रेन्चाइज लिगहरु स्थगित हुदाँ खेलाडीमा मनोवल घटेको छ ।’, ढकालले भने, ‘क्यानले कोरोना प्रकोप रोकिएपछि जति सक्दो धेरै प्रतियोगिता गर्न आवश्यक छ ।’
ढकालले आफु फिट रहन घरमै अभ्यास गरिरहेको बताए ।
‘लकडाउनको लागु गरिएको छ । घर बाहिर जान जोखिम हुन्छ । अभ्यास त गर्नै प¥यो । घरमै पनि सामान्य अभ्यास गर्न सकिन्छ । अभ्यासलाई निरन्तरता दिइरहेको छु ।’ ढकाल थपे, ‘आफ्नो आत्मविश्वास गुमाउनु भएन । खेल्न सुरु गरेपछि लय समात्न सक्नुपर्छ ।’
ढकालले अहिले कोरोनाका कारण कुनै खेलाडीमा आर्थिक समस्यामा परेको हुन सक्ने भएकाले क्रिकेट संघले बुझेर सहयोग गर्नुपर्ने विचार व्यक्त गर्छन् । आर्थिक रुपमा कमजोर भएका खेलाडीलाई राहतको आश हुने भएकाले क्यानले बुझ्नु पर्ने उनको भनाई छ ।
अर्का खेलाडी अनिल खरेल करियरमै पहिलो पटक एभरेष्ट प्रिमिएर लिग खेल्न तयारीमा थिए । उनी आफुलाई प्रमाणित गर्न पनि निकै आतुर थिए । तर कोरोनाले उनको रहर पुरा हुन पाएन । उनले इपीएलका तयारी गरिरहेको समयमा प्रतियोगिता स्थगित भएपछि निराश भएको सुनाए ।
‘करियरमै पहिलो पटक हजारौँ दर्शक अगाडी ईपीएल खेल्न आतुर थिए । तयारी चल्दै गर्दा प्रतियोगिता स्थगित भयो । अब कहिले हुने हो निश्चित छैन ।’ उनले भने ।
खरेलले घरमै फिटनेसका उपाय अपनाए पनि प्रभावकारी नभएको अनुभव सुनाउँछन् ।
‘यसले गर्दा पहिलेको लय गुमाउछु भन्ने डर छ ।’ उनले भने ।
फिटनेसमा खेलाडीले ध्यान दिनुपर्छ – फिजियो
खेलाडीले आफ्नो पुरानो लय गुम्ने चिन्ता व्यक्त गरिरहदाँ राष्ट्रिय क्रिकेट टिमका फिजियो विक्रम न्यौपाने घरमै रहेका सामाग्रीको प्रयोग गरी आफुलाई फिट राख्न सुझाव दिन्छन् ।
घरमै रनिङ गर्ने, पुस अप गर्ने, युट्युबमा फिट्नेसका भिडियो हेरेर तन्दुरुस्त रहने विधी अपनाउन सकिने उनी बताउँछन् । मनोबल बलियो बनाउन आफ्नो पुराना खेलका भिडियो समेत हेर्न सकिने र आफ्नो दिमागलाई व्यस्त बनाइरहनु पर्ने उनी सुझाउँछन् ।
‘घरमै रहेका सामाग्री वस्तुको प्रयोग गर्न सकिन्छ, मनोबल बनाइरहन आफुलाई व्यस्त राख्ने र आफ्ना पुराना खेल हेर्दा राम्रो हुन्छ ।’ न्यौपानेले भने ।
उनले खेलाडीले आफुलाई शारीरिक र मानसिक रुपमा दरिलो राख्नुपर्ने बताए । तर फिटनेसका लागि आवश्यक सामग्री छैन भन्दै खाली बस्न नमिल्ने उनी तर्क गर्छन् ।
‘अभ्याससंगै खानपानमा ध्यान पुर्याउनुपर्दछ ।’, उनले भने, ‘तर फिटनेसका सामग्री छैन भन्दै खाली बस्न मिल्दैन ।’
