एजेन्सी । भारतको महिला टिम सन् २०२१ मा हुने एकदिवसीय विश्वकपमा छनोट भएको छ ।
पाकिस्तानबिरुद्धको एक दिवसीय च्याम्पियनसिप रद्ध हुने बित्तिकै अर्को बर्ष हुुने आईसीसी महिला विश्वकपमा भारतले स्थान सुरक्षित गरेको हो ।
भारतीय महिला टिमले चीरप्रतिद्धन्दी टिम पाकिस्तानबिरुद्ध खेल्न अनुमती पाएको थिएन । भारत र पाकिस्तानबीचको खेल पछिल्लो बर्ष जुलाई र नोभेम्बरमा खेल्नुपर्ने थियो ।
तीन म्याचको सिरिज रद्ध हुने बित्तिकै दुवै टिमलाई अंक बाँडिएको थियो ।
अन्तराष्ट्रिय क्रिकेट परिषद् (आईसीसी)ले भनेको छ, 'भारत र पाकिस्तानबीचको सिरिज विशेष कारणले खेल्न नसकिने जानकारी प्राप्त भएको हो । भारतीय क्रिकेट बोर्ड बीसीसीआईले पाकिस्तानबिरुद्ध द्धिपक्षीय सिरिज खेल्न सरकारबाट अनुमती नपाएको जानकारी दिएकोछ । यो सिरिज आईसीसी महिला च्याम्पियनसिपको एक भाग थियो ।'
'भारत र पाकिस्तानबीचको सिरिज प्रतियोगिताको छनोट दौडमा महत्व राख्थ्यो । जसको आयोजना जुलाई र नोभेम्बर २०१९ मा हुनुपर्ने थियो । तर दुवै बोर्डले प्रयास गर्दा समेत सिरिज हुन सकेन । सोही कारण २०१७ मा उपविजेता बनेको भारतले न्युजिल्याण्डमा २०२१ मा हुने विश्वकपमा स्थान सुरक्षित गरिएको छ ।' आईसीसीले भनेको छ ।
भारत र पाकिस्तान टिम दुवै देशबीचको कुटनीतिक तनावका कारण मात्र आईसीसी प्रतियोगितामा मात्र खेल्दै आएका छन् । आईसीसी महिला च्याम्पियनसिप सन् २०१७ देखि २०२० सम्म सबै ८ टिमले एक आपसमा तीन तीन म्याचको सिरिज खेल्ने तालिका छ । आयोजक न्युजिल्याण्ड अंक तालिकको शीर्ष स्थानमा छ । शीर्ष चारमा रहने टिम एकदिवसीय विश्वकपमा सिधै छनोट हुनेछन् ।
कोरोना भाईरसको महामारीका कारण अन्य खेलहरु रद्ध भएका छन् । छनोटका १० टिम बाँकी तीन स्थानका लागि आपसमा प्रतिस्पर्धा गर्नेछन् ।
श्रीलंका, पाकिस्तान र न्युजिल्याण्ड बाहेक यसमा एकदिवसीय मान्यता पाएका बंगलादेश, आयरल्याण्ड तथा क्षेत्रीय छनोट विजेताको रुपमा थाईल्याण्ड, जिम्बाबे, पपुवा न्युगिनी, अमेरिका र नेदरल्याण्डले भाग लिनेछन् ।
