'बरु हिउँ पर्ला तर भारत र पाकिस्तानबीच खेल हुँदैन'

एजेन्सी । पूर्व पाकिस्तानी फास्ट बलर शोएब अख्तरले कोरोना भाईरस (कोभिड-१९) को लागि रकम संकलन गर्न भारत र पाकिस्तानबीच च्यारिटी क्रिकेट खेलाउन प्रस्ताव गरेपछि उनी एकाएक चर्चामा आए ।

अख्तरले भारत र पाकिस्तानबीच ३ एकदिवसीय अन्तराष्ट्रिय खेल दुवईमा खेलाउन सुझाब दिएका थिए । तर, भारतमा यसको ठुलो आलोचना भयो ।

भारतले सन् २०१२ पछि पाकिस्तानसँग मैत्रीपूर्ण खेल तथा सिरिज खेलेको छैन । भारत र पाकिस्तानबीच आईसीसीको प्रतियोगितामा मात्र प्रतिस्पर्धा हुने गरेको छ ।

लकडाउनको कारण सारा विश्व खेलकुद रोकिएको अवस्थामा भारत र पाकिस्तानबीचको खेल गराउनु असम्भव रहेको क्रिकेट सरोकारवाला बताउँदै आएका छन् ।

यस्तै, भारतका पूर्व कप्तान सुनिल गावस्करले समेत भारत र पाकिस्तानबीचको सिरिज हुन सम्भव नरहेको बताएका छन् ।

'भारत र पाकिस्तानको खेल हुने भन्दा लाहोरमा हिउँ पर्ने सम्भावना बढी छ,' गावस्करले सिरिजको सम्भावना बारे रहिम राजासँग युट्युबमा भने, 'दुई टिमको खेल आईसीसी प्रतियोगितामा खेल्न बाहेक सिरिज गराउनु असम्भव छ ।'

यस अघि, पूर्व कप्तान कपिल देवले समेत अख्तरको सुझाब सम्भव नरहेको बताएका थिए ।

'भारतलाई पैसाको आवश्यक छैन, खेलाडी र दर्शकको ज्यान जोखिममा राखेर क्रिकेट खेलाउनु मुर्खता हुनेछ,' कपिले भनेका थिए ।