काठमाडौं । नेपाल अन्तर्राष्ट्रिय क्रिकेट परिषद (आईसीसी) बाट एकदिवसीय अन्तर्राष्ट्रिय मान्यता पाएको राष्ट्र हो । नेपालले पहिलो पटक सन् २०१८ मा ४ वर्षको लागि एकदिवसीय अन्तर्राष्ट्रिय मान्यता पाएको थियो ।
एकदिवसीय अन्तर्राष्ट्रिय मान्यता पाएसंगै नेपालले स्वत: टी-ट्वान्टी अन्तर्राष्ट्रियको समेत मान्यता पाएको थियो ।
तर, टी-ट्वान्टी अन्तर्राष्ट्रियको मान्यता भने नेपालले सन् २०१४ मा पहिलो पटक पाएको थियो । दुई वर्षको लागि पाएको मान्यता नेपालले जोगाउन नसक्दा नेपाल पुन: एसोसियट राष्ट्रमा मात्र सिमित भएको थियो ।
अहिले नेपाललाई टेष्ट बाहेक सबै मान्यता रहेको छ । नेपालले सन् २०२२ सम्म यो मान्यता पाउने छ ।
नेपालले यी दुवै फर्म्याटमा बनाएको सर्वाधिक रनको चर्चा तल गरिएको छ ।
टी-ट्वान्टी अन्तर्राष्ट्रिय
नेपालले ३४ टी-ट्वान्टी अन्तर्राष्ट्रिय क्रिकेट खेलेको छ । सन् २०१४ मा बंगलादेशमा भएको टी-ट्वान्टी विश्वकपमा नेपालले टी-ट्वान्टी अन्तर्राष्ट्रियमा डेब्यु गरेको थियो ।
त्यसयता नेपालले ३४ टी-ट्वान्टी अन्तर्राष्ट्रिय खेल खेलिसकेको छ । जसमा नेपालले १६ जित र १७ मा हार व्यहोरेको छ भने एक खेल भने नतिजा विहिन टुङ्गिएको छ ।
नेपालले खेलेको टी-ट्वान्टी अन्तर्राष्ट्रिय मध्ये भुटानविरुद्ध बनाएको २ सय ३६ रन सर्वाधिक रन हो ।
सन् २०१९ मा कीर्तिपुरमा भएको दक्षिण एसियाली खेलकुद (साग) मा नेपालले भुटानविरुद्ध कीर्तिमानी रन बनाएको थियो ।
पहिलो ब्याटिङ गरेको नेपालले निर्धारित २० ओभरमा ३ विकेट गुमाएर २ सय ३७ रन बनाएको थियो । नेपालको विशाल योगफलमा कप्तान ज्ञानेन्द्र मल्लले शतकीय इनिङ्स खेले ।
५५ बलको सामना गरेका मल्लले ९ छक्का र ५ चौकाको मद्दतले १ सय ७ रन बनाए । शतकसंगै मल्ल नेपालको लागि अन्तराष्ट्रिय टी-ट्वान्टी क्रिकेटमा शतक प्रहार गर्ने नेपालका दोस्रो खेलाडी बने । त्यसअघि पूर्व कप्तान पारस खड्काले शतक प्रहार गरेका थिए ।
यस्तै भुटानविरुद्ध पारसले ५७ रनको अर्धशतकीय इनिङ्स खेल्दा उपकप्तान दिपेन्द्र सिंह ऐरीले अविजित ४५ रन बनाएका थिए ।
खेलमा नेपालले भुटानलाई १ सय ४१ रनले पराजित गर्दै नेपालले शानदार जित हात पार्यो । टी-ट्वान्टी अन्तर्राष्ट्रिय क्रिकेटमा नेपालको यो अहिलेसम्मकै फराकिलो जित समेत हो ।
नेपालले दिएको २ सय ३७ रनको लक्ष्य पछ्याएको भुटानले ६ विकेट गुमाएर ९५ रन मात्र बनायो ।
नेपालका पारस खड्काले २ तथा करन केसी, ललित राजबंशी र पवन सर्राफले समान १/१ विकेट लिए ।
नेपालले भुटानविरुद्ध बनाएको २ सय ३६ रनको योगफल विश्वको सर्वाधिक रन बनाउने टी ट्वान्टी अन्तराष्ट्रिय खेलमा १९ औं स्थानमा रहेको छ ।
एकदिवसीय अन्तर्राष्ट्रिय
नेपालले हालसम्म १० एकदिवसीय अन्तर्राष्ट्रिय खेल खेलेको छ । अन्तर्राष्ट्रिय क्रिकेटमा पाइला चालेको २२ वर्षपछि अर्थात सन् २०१८ मा नेपालले पहिलो पटक एकदिवसीय अन्तर्राष्ट्रिय क्रिकेटमा सहभागिता जनाउने मौका पायो ।
त्यसै वर्ष जिम्बाबेमा भएको आईसीसी विश्वकप छनोट प्रतियोगिताबाट नेपालले पहिलो पटक एकदिवसीय अन्तर्राष्ट्रिय मान्यता पाएको थियो ।
नेपालले प्रतियोगिताको समूह चरणको दोस्रो अन्तिम खेलमा पपुवा न्युगिनीविरुद्ध ६ विकेटको जित हात पार्यो । जितेपनि नेपाल विश्वकपमा छनोट हुन सकेन तर नेपाललाई एकदिवसीय अन्तर्राष्ट्रिय मान्यता पाउने सुनौलो अवसर बाँकी थियो ।
लगत्तै नेदरल्यान्ड्सले हङकङलाई पराजित गरेपछि नेपालले एकदिवसीय मान्यता पाउने पक्का भएको थियो ।
एकदिवसीय अन्तर्राष्ट्रिय मान्यता पाएको २ वर्षमा नेपालले १० खेल खेलेको छ । जसमा नेपालले ५ खेलमा जित र ५ खेलमा हार व्यहोरेको छ ।
एकदिवसीय अन्तर्राष्ट्रियमा नेपालले संयुक्त अरब इमिरेट्स (युएई) विरुद्ध बनाएको २ सय ५५ रन सर्वाधिक रन हो ।
युएईले दिएको २ सय ५५ रनको लक्ष्य पछाएको नेपाल ४ विकेटले विजयी भएको थियो । नेपालले ४४ ओभर ४ बलमा ६ विकेट गुमाएर २ सय ५५ रन बनाएको थियो । एकदिवसीय अन्तर्राष्ट्रियमा खेलमा नेपालले बनाएको हालसम्मको यो उच्च स्कोर हो ।
नेपालको जितमा तत्कालिन कप्तान पारसले १ सय १५ रनको शतकीय इनिङस खेले । हालसम्म पनि नेपालको लागि एकदिवसीय अन्तर्राष्ट्रिय खेलमा शतक बनाउने पारस एकल खेलाडी हुन् ।
यस्तै खेलका लागि उपकप्तान ज्ञानेन्द्र मल्लले ३१ रन जोडेका थिए । त्यस्तै नेपालका लागि सोमपाल कामीले अविजित २६ तथा आरिफ शेखले अविजित २१ रन बनाएका थिए।
त्यस जितसँगै नेपालले पहिलो पटक एकदिवसीय अन्तर्राष्ट्रिय सिरिज जित्न सफल भएको थियो । युएईमा भएको ३ खेलको सिरिज नेपालले २-१ ले जितेको थियो ।
-1746755007.webp)
