एजेन्सी । स्पेनिस महारथी क्लब बार्सिलोनाले फरवार्ड मार्टिन ब्रेथवेटलाई बेच्ने तयारी गरेको छ ।
आर्थिक संकटसंग जुधिरहेको बार्सिलोनाले ब्रेथवेटलाई बेच्ने तयारी गरेको हो । उनी एक महिना अघि मात्र बार्सिलोनामा अनुबन्धित भएका थिए ।
कोरोनाको संक्रमणबाट युरोपेली फुटबल प्रभावित बनेपछि ठुला क्लबहरुलाई आर्थिक समस्या देखिएको छ ।
कोरोनाकै कारण बार्सिलोना समेत खेलाडीलाई तलब दिन संघर्ष गरिरहेको छ ।
क्लबले खेलाडीको तलबमा ५० प्रतिशत कटौती गर्ने तयारी गरेको छ । तर केही खेलाडीले क्लबको निर्णयमा विमती जनाएका छन् ।
क्याटलान क्लबले मिडिल्सब्रगका फरवार्ड ब्रेथवेटलाई अनुबन्धन गरेको एक महिनामै बेच्न लागेको हो ।
उनी १५ मिलियन पाउण्डमा लेगानेसबाट बार्सिलोना आएका थिए ।
उनको बार्सिलोनासंगको सम्झौता सन् २०२४ सम्म रहेको छ । उनले क्लबमा तीन ला लिगा म्याच समेत खेलिसकेका छन् ।
स्पेनिस पत्रिका स्पोर्ट्सको रिपोर्ट अनुसार प्रिमियर लिग क्लब एभर्टन र वेस्ट ह्यामले ब्रेथवेट अनुबन्धनमा चासो देखाईरहेका छन् ।
बार्सिलोनाबाट तीन खेल खेलेका ब्रेथवेटलाई क्लबले समेत राम्रो मौका दिएको थियो । रिपोर्टका अनुसार उनी समेत समर ट्रान्सफरमा क्लबले आफुलाई सरुवा गर्न सक्नेमा जानकार थिए ।
तर ब्रेथवेट बार्सिलोनमै बसेर आफुलाई प्रमाणित गर्न चाहन्छन् ।
कोरोनाको संकटले क्लबमा राम्रो प्रभाव छाड्ने ब्रेथवेटको सम्भावनालाई कमजोर बनाईदिएको छ ।
सिरि ए क्लब टोरिनो र सासौलोले समेत ब्रेथवेट अनुबन्धनमा चासो देखाएका छन् ।
बार्सिलोनाले समर ट्रान्सफरमा अर्का खेलाडी उसमान डेम्बेलेलाई समेत बेच्ने तयारी गरेको छ ।
आर्सनल र लिभरपुल विश्वकप विजेता फ्रान्सेली खेलाडी डेम्बेलेको बहिर्गमनमा नजर लगाई रहेका छन् । बोरुसिया डर्टमण्डका पूर्व खेलाडी डेम्बेलेलाई लिन क्लबले करिब ७० मिलियन पाउण्ड खर्च गर्नुपर्नेछ ।
