ओडीआईमा सर्वाधिक रन बनाउने क्रिकेटर

काठमाडौं । नेपालले दुई वर्ष पहिले अन्तर्राष्ट्रिय क्रिकेट परिषद (आईसीसी) बाट एकदिवसीय अन्तर्राष्ट्रिय राष्ट्रको मान्यता पाएको थियो ।

जिम्बावेमा भएको आईसीसी विश्वकप एकदिवसीय छनोट प्रतियोगिताबाट नेपालले एकदिवसीय अन्तर्राष्ट्रियको ऐतिहासिक सफलता पाएको थियो ।

सन् २०१८ को मार्च १५ मा एकदिवसीय अन्तर्राष्ट्रियको मान्यता पाएपछि नेपालले थुप्रै अन्तर्राष्ट्रिय खेल समेत खेलिसकेका छन् ।

यस्तै नेपालका धेरै खेलाडीले एकदिवसीय अन्तर्राष्ट्रिय खेल खेलिसकेका छन् । तर, नेपालका कमै खेलाडीले मात्र एकदिवसीय अन्तर्राष्ट्रियमा १०० भन्दा बढी रन बनाउन सफल भएका छन् ।

एकदिवसीय अन्तर्राष्ट्रियमा एक सय बढी रन बनाउन सफल नेपालका खेलाडीहरुको सूची तयारी गरिएको छ ।

पारस खड्का -

पूर्व कप्तान पारस खड्का नेपालका लागि एकदिवसीय अन्तराष्ट्रिय क्रिकेटमा कप्तानी गर्ने पहिलो खेलाडी हुन् । यस्तै उनी नेपालको लागि एकदिवसीय अन्तराष्ट्रिय खेलमा सर्वाधिक रन बनाउने खेलाडी समेत हुन् ।

पारसले १० खेलमा ३ सय १५ रन बनाएका छन् । नेपालले खेलेको सबै एकदिवसीय अन्तराष्ट्रिय खेल खेलका पारसले १ शतक र १ अर्धशतक बनाएका छन् । पारस एकदिवसीय अन्तराष्ट्रिय खेलमा शतक बनाउने एकल नेपाली खेलाडी समेत हुन् । उनले सन् २०१९ मा युएईविरुद्धको खेलमा १ सय १५ रनको शतकीय इनिङ्स खेलेका थिए ।

ज्ञानेन्द्र मल्ल -

एकदिवसीय अन्तराष्ट्रिय खेलमा नेपालको दोस्रो कप्तान हुन ज्ञानेन्द्र मल्ल । उनले १० एकदिवसीय अन्तराष्ट्रिय खेलमा २ सय २२ रन बनाएका छन् ।

मल्ल नेपालको लागि एकदिवसीय अन्तराष्ट्रिय खेलमा अर्धशतक बनाउने पहिलो खेलाडी हुन् । उनले नेपालले खेलेको पहिलो एकदिवसीय अन्तराष्ट्रिय खेलमा नै अर्धशतक बनाएका थिए । यस्तै एकदिवसीय अन्तराष्ट्रिय खेलमा २ अर्धशतक बनाउने ज्ञानेन्द्र एकल नेपाली खेलाडी हुन् ।

उनले नेदरल्यान्ड्स र ओमानविरुद्ध अर्धशतक बनाएका छन् । संयोग भनौ उनले अर्धशतक बनाएको दुवै खेलमा नेपाल पराजित भएको थियो । ज्ञानेन्द्र हाल नेपाल क्रिकेट टिमका कप्तान हुन् ।

दिपेन्द्र सिंह ऐरी -

नेपाली राष्ट्रिय टोलीका उप-कप्तान दिपेन्द्र नेपालको लागि एकदिवसीय अन्तराष्ट्रिय खेलमा सर्वाधिक रन बनाउने तेस्रो खेलाडी हुन् । उनले १० खेलमा १ सय ५९ रन बनाएका छन् ।

हालसम्म उनले कुनै पनि एकदिवसीय अन्तराष्ट्रिय खेलमा अर्धशतक बनाउन सकेका छैनन् । सन् २०१८ को एसिया कप छनोटमा युएईविरुद्ध बनाएको ४० रन नै उनको एकदिवसीय अन्तराष्ट्रिय खेलमा सर्वाधिक रन हो ।

विनोद भण्डारी -

नेपालका विकेटकिपर ब्याट्सम्यान विनोद एकदिवसीय अन्तराष्ट्रिय खेलमा सर्वाधिक रन बनाउने चौंथो नेपाली खेलाडी हुन् । उनले ७ खेल खेल्दा ६ इनिङ्स ब्याटिङ गर्दै १ सय ५५ रन बनाएका छन् । यस्तै उनले १ अर्धशतक समेत बनाएका छन् ।

उनले गत महिना नेपालमा भएको विश्वकप लिग-२ को खेलमा अमेरिकाविरुद्ध ५९ रनको अर्धशतक बनाएका थिए । घरेल भूमिमा एकदिवसीय अन्तराष्ट्रिय खेलमा अर्धशतक बनाउने विनोद नेपालको दोस्रो खेलाडी हुन् ।

सोमपाल कामी -

अलराउण्डर सोमपाल कामी नेपालको लागि एकदिवसीय अन्तराष्ट्रिय खेलमा सर्वाधिक रन बनाउने पाँचौं खेलाडी हुन् । उनले ६ खेलमा १ सय ४६ रन बनाएका छन् ।

यस्तै उनले १ अर्धशतक बनाएका छन् । उनले नेदरल्याण्डविरुद्ध सन् २०१८ मा अर्धशतक बनाएका थिए । नेदरल्याण्डविरुद्ध बनाएको ६१ रनको स्कोर नै सोमपालको एकदिवसीय अन्तराष्ट्रिय खेलमा सर्वाधिक रन हो ।

नेपालको लागि एकदिवसीय अन्तराष्ट्रिय खेलमा सर्वाधिक रन अर्धशतक बनाउने उनी तेस्रो खेलाडी हुन् । यस्तै सोमपाल एकदिवसीय अन्तराष्ट्रियको एकै खेलमा ५ विकेट लिने पहिलो नेपली हुन् ।

आरिफ शेख -

एकदिवसीय अन्तराष्ट्रिय खेलमा सय रन कटाउन सफल छैटौं खेलाडी आरिफ शेख हुन् । यस्तै उनी नेपालको लागि एकदिवसीय अन्तराष्ट्रिय खेलमा सर्वाधिक रन बनाउने छैठौं खेलाडी हुन् । उनले १० खेल खेल्दा ९ इनिङ्स ब्याटिङ गर्दै १ सय ३० रन बनाएका छन् ।

तर, आरिफले हालसम्म एकदिवसीय अन्तराष्ट्रिय खेलमा अर्धशतक बनाउन सकेका छैनन् । युएई भ्रमणमा आरिफले युएईविरुद्धको दोस्रो खेलमा ४९ बल खेल्दै २९ रन बनाएको नै एकदिवसीय खेलमा सर्वाधिक स्कोर हो ।