एजेन्सी । कोरोना भाइरसको त्रासका कारण विश्वभर खेलकुद प्रतियोगिता रोकिएको छ । मार्च २९ देखि सुरु हुने तय भएको भारतीय चर्चित फ्रेन्चाइज लिग इण्डियन प्रिमियर लिग (आईपीएल) १७ दिन पछाडी धकेलिएको छ ।
नयाँ मिति अप्रिल १५ मा पनि लिग सुरु हुनेमा शंका छ । त्यसैले भारतीय क्रिकेट बोर्ड (बीसीसीआई) फ्रेन्चाइज टिमहरु निरन्तर छलफल गरिरहेको छ ।
बैठकका अनुसार बीसीसीआईका अध्यक्ष सौरभ गांगुलीले मार्च महिनाको अन्तिमसम्म भाइरसको प्रकोपलाई हेरेर थप निर्णय लिने बताएका छन् ।
यस्तै, उनले आईपीएललाई छोट्टाएर खेलाउन सकिने समेत बताएका छन् ।
’१५ दिन त्यसैपनि ढिलो हुनेछ । त्यसैले लिगलाई छोट्याउनु पर्छ । कति दिन छोट्याउने भनेर अहिले भन्न सक्ने अवस्था छैन ।’ गांगुलीले भनेका छन् ।
भाइरसकै कारण दक्षिण अफ्रीकाविरुद्धको एकदिवसीय सिरिज समेत भारतले रद्द गरिएको छ । गांगुलीले खेलाडीको स्वास्थ्यलाई ध्यानमा राखेर सिरिज रद्द गरिएको जानकारी दिएका छन् ।
’हामी अगाडीको अवस्था हेरेर विचार गर्नेछौ । सुरक्षानै सबैभन्दा ठुलो कुरा हो ।’ गांगुलीले थपे, ’सरकारको निर्देशन तथा अहिलेको अवस्था मध्यनजर गर्दै घरेलु प्रतियोगितामा समेत रोक लगाईएको हो ।’
बीसीसीआईको उच्च अधिकारी र फ्रेन्चाइज टिमसंगको बैठकमा लिगको समय छोटो बनाउने थप ६ उपायको बारेमा छलफल भएको छ ।
यस्तै, बीसीसीआईले हरेक हप्ता अवस्थाको समिक्षा गर्ने बताएको छ ।
’हरेक हप्ता अवस्थाको समिक्षा गर्छौं ।’ गांगुलीले थपे, ’यसमा कम गर्ने पर्छ । हामी आईपीएलको आयोजना गर्न चाहन्छौं तर सुरक्षालाई वेवास्ता गर्न सक्दैनौं ।’
भारतमा कोरोना भाइरसको कारण १ सय ५ संक्रमित छन् । जसमा २ जनाको ज्यान गएको छ ।
