मार्च र जुनमा तय विश्वकपको एसिया छनोट स्थगित

काठमाडौं । सन् २०२२ मा कतारमा आयोजना हुने फिफा विश्वकप फुटबलको लागि जारी एसियाको सम्पूर्ण छनोट खेल स्थगित भएको छ ।

विश्वमा महामरीको रुपमा फैलिएको कोरोना भाईरसको कारण विश्व फुटबलको सर्वोच्च निकाय फिफा र एसियन फुटबल फेडेरेसन (एएफसी) एसिया छनोट खेल स्थगित गर्न सहमत भएका छन् ।

फिफा र छनोटमा सहभागी राष्ट्रसँगको छलफलपछि मार्च र जुनमा तय भएको छनोट खेल स्थगित गर्ने निर्णय गरिएको एएफसीले सोमबार जनाएको छ ।

एसिया छनोट अन्तर्गत मार्च २३ र ३१ तथा जुन १ र ९ मा तय भएको खेल स्थगित गरिएको हो ।

फिफा र एएफसीले छनोट खेलको नयाँ मिति कोरोना भाईरस नियन्त्रणमा आएपछि उपलब्ध गराउने बताएको छ ।

यस्तै तुर्किमिनिस्तानमा तय भएको एएफसी फुटसल च्याम्पियनसिप पनि स्थगित गरिएको छ ।

विश्वकप छनोट अन्तर्गत नेपालले मार्चमा अष्ट्रेलिया र चाईनिज ताईपेसँग घरेलु मैदानमा खेल्ने तालिका रहेको थियो ।

नेपालले मार्च २३ मा चाईनिज ताईपेसँग र मार्च ३१ मा अष्ट्रेलियासँग दशरथ रंगशालामा खेल्ने तय भएको थियो । तर, नेपालले प्रशिक्षण समेत बन्द गरिसकेको छ ।

विश्वकप छनोटको समूह चरणको चारै अवे खेल खेलिसकेको नेपालले अब बाँकी खेल घरेलु मैदानमा खेल्नेछ ।

नेपाल पहिलो लेगको खेलमा कुवेतसँग ७–० र दोस्रो लेगमा १–० ले पराजित भएको थियो । यस्तै, अष्ट्रेलियासँग ५–० र जोर्डनसंग ३–० ले पराजित भएको थियो । अवे खेल अन्तर्गत नेपालले चाईनिज ताईपेलाई २–० ले हराएको थियो ।