राजु खड्काको 'त्यो' ऐतिहासिक शतक !

काठमाडौं । सन् २००३ मार्च ८ अर्थात् आजकै दिन । नेपालले एसीसी इमर्जिङ नेसन्स प्रतियोगितामा भुटानलाई ३ सय ५३ रनको फराकिलो अन्तरले पराजित गरेको थियो ।

कीर्तिपुरस्थित त्रिवि क्रिकेट मैदानमा भएको खेलमा नेपालले भुटानमाथि ३ सय ५३ रनको कीर्तिमानी जित निकालेको थियो ।

खेलमा नायकको भूमिका कप्तान राजु खड्काले खेलेका थिए ।

खेलमा भुटानले टस जितेर नेपाललाई ब्याटिङको निमन्त्रणा दिएपछि ब्याटिङमा आएको नेपालले ५० ओभरमा ८ विकेट गुमाएर ३ सय ९७ रन बनायो ।

नेपालको कीर्तिमानी स्कोरमा कप्तान राजु खड्काले १ सय ५ रनको शतकीय इनिङ्स खेले । मात्र ५० बल खेलेका उनले १४ चौका र ४ छक्का प्रहार गर्दै अविजित रहे ।

शतकसँगै खड्का नेपालका लागि अन्तराष्ट्रिय क्रिकेटमा शतक प्रहार गर्ने पहिलो खेलाडी बने । त्यसअघि कुनै पनि नेपाली खेलाडीले अन्तराष्ट्रिय क्रिकेटमा शतक प्रहार गरेका थिएनन् ।

यस्तै नेपालको ठुलो स्कोरमा सन्दीप श्रेष्ठले ६० रनको अर्धशतकीय इनिङ्स खेल्दा बिनोद दासले ४३ रन, शक्ति गौचनले ३९, पारस लुनियाले ३५, परेश लोहनीले २९ रन जोडे ।

महबुब आलमले २१ रन जोड्दा दिपेन्द्र चौधरीले १० र राजु बस्नेतले ३ रनको योगदान गरे । सन्जम रेग्मी ४ रनमा अविजित रहे ।

जवाफी ३ सय ९८ रनको फराकिलो लक्ष्य पछाउने क्रममा भुटान मात्र ४४ रनमा समेटियो । उसका एस छेत्रीले १२ तथा डी डुक्पा ले १० रन बनाउनु बाहेक अन्य खेलाडीले दोहोरो रन बनाउन सकेनन् ।

भुटानका ६ खेलाडी डक आउट भएका थिए ।

भुटानमाथि कीर्तिमानी जित निकाल्न राजु बस्नेतले ५ विकेट लिए । यस्तै महबुब आलमले २ विकेट तथा राजु खड्का, बिनोद दास र शक्ति गौचनले समान १/१ विकेट हात पारे ।

खेलमा प्लेअर अफ द म्याच राजु खड्का घोषित भए ।

भुटान माथि नेपालले हात पारेको ३ सय ५३ रनको फराकिलो जित हाल सम्म नेपालले तोड्न सकेको छैन ।

माल्दिभ्स, भुटान र नेपाल सहभागी प्रतियोगितामा नेपालले सहजै उपाधि जितेपछि अर्को सन् २००५ को संस्करणमा नेपाललाई सहभागिता जनाउन दिईएन ।