जिम्बावेविरुद्ध बंगलादेशको क्लिन स्विप

एजेन्सी । घरेलु टिम बंगलादेशले जिम्बावेविरुद्धको तीन खेलको एकदिवसीय क्रिकेट सिरिजमा क्लिन स्विप गरेको छ ।

सिलेटमा शुक्रबार राति भएको अन्तिम तथा तेस्रो खेलमा जिम्बावेलाई डिएल पद्दतिको आधारमा १ सय २३ रनले पराजित गर्दै बंगलादेशले सिरिज ३-० ले क्लिन स्विप गरेको हो ।

टस हारेर पहिले ब्याटिङ गरेको बंगलादेशले वर्षाले खेल रोकिनु अघि ४३ ओभरमा ३ विकेट गुमाएर ३ सय २२ रन जोडेको थियो । उसका तमिम इकबाल र लिटोन दासले शतकीय इनिङ्स खेले ।

लिटोनले १ सय ७६ रनको शतकीय इनिङ्स खेल्दा इकबाल १ सय २८ रनमा अविजित रहे । जिम्बावेका कार्ल मुम्बाले ३ विकेट लिए ।

त्यसपछि जिम्बावेले डिएल पद्दतिमा ४३ ओभरमा ३ सय ४२ रनको नयाँ लक्ष्य पाएको थियो । र, जवाफी ब्याटिङ गरेको जिम्बावे ३७ ओभर ३ बलमा अलआउट हुदै २ सय १८ रनमा समेटियो ।

जिम्बावेका सिकन्दर राजाले ६१ रनको अर्धशतकीय इनिङ्स खेले । वेस्ले माधिभिराले ४२ रन जोड्दा रेगिस चाकभाले ३४ तथा कप्तान सिन विलियम्सले ३० रन जोडे ।

बंगलादेशका मोहमद साइफुदिनले ४ तथा ताइजुल इस्लामले २ विकेट लिए ।

जिम्बावेविरुद्धको सिरिज क्लिन स्विप गरेसँगै मश्राफी मोर्टजाले कप्तानी पद समेत छाडेका छन् ।

यस अघि पहिलो खेलमा बंगलादेशले जिम्बावेलाई १ सय ६९ रनले पराजित गरेको थियो । यस्तै दोस्रो खेलमा जिम्बावेलाई ४ रनले पराजित गर्दै बंगलादेशले एक खेल अगाबै सिरिज २-० ले जितेको थियो ।