काठमाडौं । इन्डोनेसियामा आयोजना हुने १८ औं संस्करणको एसियन गेम्सको लागि ७ करोड खर्च हुने भएको छ । एसियन गेम्सको लागि खेलाडी तयारी र सहभागिता बापत ७ करोड खर्च हुने भएको हो ।
राष्ट्रिय खेलकुद परिषद् (राखेप) ले बुधबार एक पत्रकार सम्मेलन गर्दै एसियन गेम्सको लागि ७ करोड खर्च भएको जनाएको हो । राखेपले खेलाडीको बैदेशिक प्रशिक्षण, प्रतियोगिताको दौरान लाग्ने खर्च लगायत गरेर ७ करोड लाग्ने बताएको हो । जसमध्ये ५ करोड सरकारले उपलब्ध गराउने राखेपले जनाएको छ । विशेष तयारीको लागि राखेपले १९ खेललाई बैदेशिक प्रशिक्षणमा पठाएको थियो ।
यहिँ भदौ २ गतेबाट १७ गतेसम्म संचालन हुने एसियन गेम्समा नेपालबाट २९ खेलले सहभागिता जनाउदै छ । एसियन गेम्स अन्तर्गत पुरुष फुटबल लगायतका केहि खेल भने सुरु भईसकेको छ । पुरुष फुटबलको पहिलो खेलमा नेपाल जापानसंग १ – ० ले पराजित भएको छ ।
राखेपले एसियन गेम्समा २९ खेलबाट खेलाडी, प्रशिक्षक, ब्यवस्थापक, अफिसियल गरी २ सय ८५ जनाले सहभागिता जनाउने समेत पत्रकार सम्मेलनबाट जनाएको छ । जसमा १ सय ८५ खेलाडीले विभिन्न स्पर्धामा नेपालको प्रतिनिधित्व गर्दै छन् ।
नेपालबाट १ सय २९ पुरुष र ५६ महिला खेलाडी इन्डोनेसिया जानेछन् । त्यस्तै ४८ प्रशिक्षक, २४ ब्यवस्थापक, २७ अफिसियल र १ दोभाषे इन्डोनेसिया जानेछन् । विगतको तुलनामा नेपालले यो पटक धेरै खेलाडीलाई एसियन गेम्समा पठाएको हो । नेपालमा आयोजना हुने १३ औं साग गेम्सलाई मध्यनजर गर्दै राखेपले बढी खेलाडी सहभागी गराएको हो ।
इन्डोनेसियाको राजधानी जकार्ता र पालेम्वाङ सहरमा हुने एसियन गेम्समा भने नेपालले धेरै पदकको आशा गरेको छ । राखेपका सदस्य सचिब केशव कुमार विष्टले एसियन गेम्सको लागि तयारी विगतको भन्दा राम्रो भएको कारण पदकको संख्या बढ्ने बताए ।
पत्रकार सम्मलेनमा सदस्य सचिब बिष्टले भने, 'तयारी विगतको भन्दा राम्रो भएको छ । यो पटक हामीले धेरै पदक जित्ने छौं । यसको यथार्थ फुटबलले देखाइसकेको छ ।'
एसियन गेम्समा नेपालले अहिलेसम्म कुल २३ पदक जितेको छ । जसमा एक रजत र अन्य कास्य पदक रहेको छ ।
नेपालले सहभागिता जनाउने २९ खेल मध्ये २३ खेल जकार्ता र बाँकी ६ खेल पालेम्वाङमा हुनेछ । नेपालले आर्चरी, एथलेटिक्स, बास्केटबल (थ्री अन थ्री), ब्याडमिन्टन, बक्सिङ, फेन्सिङ, गोल्फ, जुडो, कराते, कबड्डी, पौडी, तेक्वान्दो, टेबलटेनिस, भलिबल, भारोत्तोलन, उसु, कुराँस, पेनकेक सिलात, कुस्ती, स्क्वास, साइक्लिङ, फुटबल, प्याराग्लाइडिङ, लनटेनिस, सुटिङ, ट्रायथलन, सेपाकताक्रो, स्पोर्ट्स क्लाम्बिङ र स्केटबोर्डमा सहभागिता जनाउदै छ ।
यी खेल मध्ये लनटेनिस, सुटिङ, ट्रायथलन, सेपाकताक्रो, स्पोर्ट्स क्लाम्बिङ र स्केटबोर्ड पालेम्वाङमा हुनेछ भने बाँकी जकार्तामा हुनेछ ।
-1756657034.jpeg)
