अमेरिकाविरुद्ध नेपालले बनाएको ४ कीर्तिमान

काठमाडौं । विश्वकप छनोटको रुपमा रहेको आईसीसी विश्वकप क्रिकेट लिग-२ अन्तर्गतको त्रिकोणात्मक सिरिजको अन्तिम खेलमा नेपालले अमेरिकामाथि सानदार जित निकालेको छ ।

टियु क्रिकेट मैदानमा बुधबार नेपालले अमेरिकालाई ८ विकेटले पराजित गर्यो । जितसँगै नेपालले सिरिजको ४ खेलमा २ जितसहित सुखद अन्त्य गर्यो ।

नेपालले टस जितेर पहिले फिल्डिङ गर्ने निर्णय गरेपछि ब्याटिङमा आएको अमेरिका मात्र ३५ रन जोड्दा अलआउट भयो । नेपाली स्पिनर सामु अमेरिकाका कुनै खेलाडी खुलेर खेल्न सकेनन् ।

स्पिनर सन्दीप लामिछानेले ६ तथा सुशन भारीले ४ विकेट लिएपछि अमेरिका सस्तैमा समेटियो । उसका जेभियर मार्सलले सर्वाधिक १६ रन जोडे । अन्य ब्याट्सम्यानले दोहोरो अंक जोड्न सकेनन् ।

अमेरिकाले दिएको लक्ष्य नेपालले ५ ओभर २ बलमा मात्र २ विकेट गुमाएर पुरा गर्यो ।

करिब ८ घण्टामा सकिने एकदिवसीय खेल बुधबार मात्र १ घण्टा २० मिनेटमा सकियो । त्यसमा समेत करिब ४० मिनेटको इनिङस ब्रेक रहेको थियो ।

अमेरिकाविरुद्ध जित निकाल्ने क्रममा नेपालले केहि कीर्तिमानहरु समेत बनाएको छ ।

नेपालले बनाएको कीर्तिमान के के ?

एकदिवसीयमा सर्वाधिक कम स्कोर :

एकदिवसीय अन्तर्राष्ट्रिय क्रिकेट नेपालविरुद्ध अमेरिकाले बनाएको स्कोर सर्वाधिक कम स्कोरको बराबरी हो । यस अघि सन् २००४ मा जिम्बावेले श्रीलंकाविरुद्ध ३५ रन बनाएर सर्वाधिक कम स्कोर बनाउने कीर्तिमान बनाएको थियो ।

सर्वाधिक छिटो लक्ष्य पुरा :

नेपालले एकदिवसीय अन्तर्राष्ट्रियमा आफ्नो सर्वाधिक छिटो लक्ष्य पुरा गर्ने कीर्तिमानी बनाएको छ । अमेरिकाले दिएको लक्ष्य नेपालले ५ ओभर २ बलमा पुरा गरेको थियो ।

यस्तै एकदिवसीय अन्तराष्ट्रियमा नेपाल विपक्षीले दिएको लक्ष्य सर्वाधिक छोटो पुरा गर्ने विश्वको तेस्रो राष्ट्र बनेको छ । यसअघि जिम्बाबेले दिएको ४० रनको लक्ष्य श्रीलंकाले ४ ओभर २ बलमा पुरा गरेको थियो । यस्तै श्रीलंकाले नै क्यानाडाले प्रस्तुत गरेको लक्ष्य ४ ओभर ४ बलमा पुरा गरेको खेल दोस्रो स्थानमा छ ।

एसोसियटको उत्कृष्ट बलिङ फिगर :

अमेरिकाविरुद्ध सन्दीप लामिछानेले १६ रन खर्चेर ६ लिएको बलिङ फिगर एसोसियट क्रिकेटको सर्वाधिक उत्कृष्ट बलिङ फिगर हो । यस अघि अफगानिस्तानले टेष्ट मान्यता पाउनु अघि स्पिनर राशिद खानेले वेष्ट इडिजविरुद्ध १८ रन खर्चेर ७ विकेट लिएका थिए ।

फराकिलो विकेट जित :

नेपालले एकदिवसीय अन्तराष्ट्रियमा विकेटको हिसाबमा हात पारेको यो फराकिलो जित हो । यसअघि नेपालले युएईलाई ४ विकेटको अन्तरले पराजित गरको थियो ।