एक रनले विश्वकप पुग्न चुकेको नेपाल !

काठमाडौं । आईसीसी यू-१९ एकदिवसीय विश्वकप क्रिकेटको उपाधि बंगलादेशले जितेको छ ।

आइतबार भएको फाइनलमा भारतलाई डीएल पद्दतिको आधारमा ३ विकेटले पराजित गर्दै बंगलादेशले पहिलो पटक यू-१९ विश्वकपको उपाधि जितेको हो ।

यसअघि सन् २०१६ मा घरेलु भूमिमा भएको विश्वकपमा तेस्रो स्थानमा चित्त बुझाएको बंगलादेशले यस संस्करणमा भने उपाधि जित्दै इतिहास रचेको छ ।

बंगलादेशले ऐतिहासिक उपाधि जित्दा नेपाललाई भने एक रनको पराजयले झस्काई रह्यो ।

यू-१९ विश्वकपमा राम्रो छाप छोड्न सफल नेपाल त्यहिँ एक रनको हारले यस संस्करणमा सहभागिता जनाउन पाएनन् ।

गत वर्ष भएको आईसीसी यू-१९ एकदिवसीय विश्वकप एसिया छनोटको दोस्रो खेलमा नेपाल युएईसँग एक रनले पराजित भएको थियो । वर्षाको कारण खेलले पूर्णता पाउन नसकेपछि डीएल पद्दतिबाट नतिजा निकालिएको थियो ।

तर, डीएल पद्दति नेपालको लागि दुर्भाग्य बन्यो । खेलमा नेपाल युएईसँग एक रनले पराजित भयो ।

नेपालले दिएको २ सय ४८ रनको लक्ष्यसहित युएईले जवाफी ब्याटिङ गरिरहदा पानी परेपछि खेल रोकिएको थियो । त्यसपछि निरन्तर परेको वर्षाले खेल हुने सम्भावना सकिदा खेलको निर्णय डीएलबाट गरिएको थियो ।

डीएलमा युएईले ३० ओभरमा जितका लागि १ सय २२ रनको नयाँ लक्ष्य पाएपछि नेपाल १ रनले पराजित भएको हो ।

वर्षाले खेल रोकिनु अघि युएईले ३० ओभरमा ३ विकेट गुमाएर १ सय २२ रन जोडेको थियो । युएईका भ्रितीय अर्भिन्दले अविजित ४७ रन जोडेका थिए । यस्तै आन्स टन्डनले ५४ रनको अर्धशतकीय इनिङ्स खेलेका थिए । नेपालका कमल सिंह ऐरी र सागर ढकालले १/१ विकेट लिएका थिए ।

यसअघि टस हारेर पहिले ब्याटिङ गरेको नेपालले पुरै ५० ओभरमा अलआउट हुँदै २ सय ४७ रन बनाएको थियो ।

नेपालको उच्च स्कोरमा भिम सार्की र हरि चौहानले अर्धशतकीय इनिङ्स खेलेका थिए । अविजित रहेका हरिले ७४ बलमा ६७ रन बनाए । यस्तै भिमले ५४ बलमा ५३ रनको योगदान दिए । हरि र भिमले छैटौं विकेटका लागि ९२ रनको साझेदारी गरेका थिए । यस्तै नेपालका लागि ओपनर रित गौतमले ४४ रन जोड्दा आरिफ शेखले २७ रन बनाए । कप्तान रोहित कुमार पौडेल १८ रनमा आउट हुँदा पवन सर्राफले १२ रन जोडेका थिए ।

प्रतियोगिताको शीर्ष स्थानमा रहने टिम विश्वकपको लागि छनोट हुने भएकाले सो खेल नै नेपालको लागि अभिसाप बन्यो । ५ खेलमा ४ जित निकाल्दा नेपाल छनोटको दोस्रो स्थानमा रहयो । युएई भने ५ खेलमा ५ जित निकाल्दा विश्वकपमा छनोट भयो ।

यू-१९ विश्वकपमा नेपालको ईतिहास कस्तो ?

सन् १९८८ बाट सुरु भएको यू-१९ विश्वकपले १२ औं संस्करण पार गरिसकेको छ । सन् १९८८ बाट प्रतियोगिता सुरु भएपनि सन् १९९८ बाट मात्र निरन्तरता पाएको थियो ।

पहिलो संस्करणमा ८ राष्ट्रले सहभागिता जनाएका थिए । त्यसपछि भने सहभागी राष्ट्र बढाउँदै १६ राष्ट्र बनाईएको थियो ।

आईसीसीको सदस्य नभएको कारण नेपालले पहिलो र दोस्रो संस्करणको विश्वकपमा सहभागिता जनाउन पाएको थिएन । नेपालले सन् १९९८ मा आईसीसीबाट एसोसिएट राष्ट्र मान्यता प्राप्त गरेको थियो ।

नेपालले यू-१९ विश्वकपमा सात पटक प्रतिस्पर्धा गरिसकेका छन् । सन् २००० मा नेपालले पहिलो पटक यू-१९ विश्वकप खेलेको थियो । जसमा नेपालले आठौं स्थान प्राप्त गर्दै ईतिहास रचेको थियो ।

तर, सात पटक विश्वकप खेलेपनि नेपालले आठौं स्थान भन्दा माथि उक्लन सकेको छैन । पहिलो सहभागिता र सन् २०१६ मा नेपालले आठौं स्थान हात पारेको थियो ।

यू-१९ विश्वकपको ईतिहासमा नेपालले ३ पटक मात्र विश्वकप छनोट चरण पार गर्न सकेन । नेपालले सन् २०१८, २०१४ र २०१० मा विश्वकप खेल्ने अवसर गुमाको थियो ।

हालसम्म नेपालले यू-विश्वकपमा ४३ खेल खेलेको छ । जसमा २१ खेलमा जित हात पारेको छ ।

नेपालले यू-१९ विश्वकपमा सधै उत्कृष्ट प्रदर्शन गर्दै आएको छ । नेपालले विभिन्न टेष्ट राष्ट्रलाई समेत पाखा लगाउँदै आएको छ । नेपालले विश्वकपमा जिम्बाबे, बंगलादेश, आयरल्याण्ड, न्युजिल्यान्ड र दक्षिण अफ्रिका जस्ता राष्ट्रलाई पराजित गरिसकेको छ ।

सन् २०१६ को विश्वकपमा न्युजिल्यान्डविरुद्ध निर्धारित ५० ओभरमा ८ विकेट गुमाएर बनाएको २३८ रन नै नेपालको सवार्धिक उच्च स्कोर हो ।

सन् २०१२ को विश्वकपमा नामिबियाविरुद्ध प्रदिप ऐरीले ७६ बलमा बनाएको अविजित ९८ रन नै व्यक्तिगत उच्च स्कोर हो ।

यस्तै २०१२ को विश्वकपमा पपुवा न्युगिनीविरुद्ध राहुल विश्वकर्माले ६.२ ओभर बलिङ गर्दै ३ रन खर्चेर ६ विकेट हात पारेको बलिङ फिगर विश्वकप इतिहासकै उत्कृष्ट बलिङ प्रदर्शन हो ।