'लक्की' रहेछु !

काठमाडौं । विश्वकप छनोटको रुपमा रहेको आईसीसी विश्वकप क्रिकेट लिग-२ अन्तर्गत अमेरिका र ओमानसँगको त्रिकोणात्मक सिरिजका लागि ओपनर ब्याट्सम्यान सुवास खकुरेल राष्ट्रिय टिममा फर्किएका छन् ।

टिमका महत्वपूर्ण खेलाडी शरद भेषवाकरले चोट बोकेपछि बाँकी खेलका लागि सुवास खकुरेललाई नेपाल क्रिकेट संघ (क्यान)  ले टिममा बोलाईएको हो ।

वैकल्पिक खेलाडीको रुपमा रहेका सुवास शुक्रबारबाट टिमसँग जोडिएका छन् ।

ओमानसँगको खेलमा चोट बोकेका शरदलाई चिकित्सकले १० दिन आराम गर्न भनेपछि बाँकी रहेको ३ खेलमा सुवासले मौका पाएका हुन् । ओमानविरुद्ध शरदले ५५ रनको अर्धशतकीय इनिङ खेलेका थिए ।

शरदको विकल्पमा सुवास उपयुक्त रहेका कारण उनलाई अमेरिकासँगको २ तथा ओमानसँग बाँकी रहेको १ खेलको लागि टिममा बोलाईएको हो ।

वैकल्पिक खेलाडीको रुपमा रहेर घरेलु मैदानमा एकदिवसीय क्रिकेट खेल्न पाउँदा सुवास आफुलाई भाग्यमानी ठान्छन् ।

'शरद (दाई) को लागि दुखि छु । नेपालले घरेलु सिरिजमा शरद जस्तो खेलाडी गुमाउनु दुखको कुरा हो,' टिममा फर्किएपछि सुवासले खेलपाटीसँग भने, 'आफ्नो हकमा लक्की रहेछु । टिमको लागि राम्रो योगदान गर्ने प्रयास गर्नेछु ।'

सुवास विकेटकिपर ब्याट्सम्यान हुन् । उनले ओपनिङ ब्याटिङ गर्ने गर्छन् । अहिले नेपाली टिममा ओपनरको खाँचो देखिएको छ । ओमानविरुद्ध नेपालका भरपर्दा ब्याट्सम्यान पारस खड्का र ज्ञानेन्द्र मल्लको नयाँ जोडीले एकदिवसीय अन्तराष्ट्रियमा परिक्षण गरेपनि सफल हुन सकेका थिएनन् ।

त्यसैले शनिबार अमेरिकाविरुद्ध सुवासले ओपनिङ गर्ने बलियो सम्भावना रहेको छ । सुवासले अब ज्ञानेन्द्रलाई अमेरिकाविरुद्धको खेलमा साथ दिने बलियो सम्भावना रहेको छ ।

सुवास समेत आफ्नो स्थानमा खेल्न चाहेको बताउँछन् ।

'पाएसम्म म आफ्नो स्थानमा खेल्ने छु,' सुवासले थपे, 'हेरौं अब टिमसँग के कुरा हुन्छ, त्यसपछी बल्ल थाहा हुन्छ ।'

इतिहास हेर्दा नेपाल र अमेरिकाको खेलमा सुवासको राम्रो तथ्याङ्क रहेको छ । सन् २०१२ को मलेसियामा भएको डिभिजन चारमा नेपालले अमेरिकालाई पराजित गर्दा सुवासले शतक प्रहार गरेका थिए । सुवास अमेरिकाविरुद्ध शतक प्रहार गर्ने पहिलो र एक्लो नेपाली खेलाडी हुन् । उनले व्यक्तिगत पहिलो अमेरिकाविरुद्धको खेलमा नै शतक प्रहार गरेका थिए ।

यस्तै अमेरिकासंगको अन्तिम भेटमा सुवासले अर्धशतक बनाउनबाट मात्र एक रनले पछि परेका थिए । सन् २०१४ मलेसियामा भएको लिग डिभिजन तिनको दोस्रो खेलमा नेपाल डीएल पद्दतिमा १० रनले विजयी भएको थियो ।

अमेरिकाले दिएको २ सय २४ रनको लक्ष्य पछाएको नेपालले २२ ओभरमा १ विकेट गुमाएर ७३ रन बनाउँदा खराब मौषमले खेल विथोलेको थियो । सो खेलमा सुवास खकुरेल ४९ रनमा अविजित रहँदा नेपाल १० रनले विजयी भयो । सो खेलमा सुवास म्यान अफ द म्याच समेत बेनका थिए ।

सुवासले अमेरिकाविरुद्ध ५ खेलमा २ सय ३५ रन बनाएका छन् । अमेरिकाविरुद्ध सुवासको औषत ७८ दशमलब ३३ को रहेको छ जुन नेपाली ब्याट्सम्यान सबै भन्दा धेरै औषत हो ।

घरेलु टिम नेपाललाई अमेरिकाको चुनौती