काठमाडौं । नेपाली मूलका सुरज कुमार हाल ओमानको राष्ट्रिय क्रिकेट टिमबाट खेल्छन् । सुरज भारतमा जन्मिए । उनका बुवा र आमा भने नेपालका हुन् ।
सुरजले राम्रोसँग नेपाली बोल्न जानेका छन् । उनी अहिले विश्वकप क्रिकेट लिग–२ अन्तर्गतको सिरिज खेल्न नेपालमा छन् ।
उनले पहिलो खेल घरेलु टिम नेपालसँग खेले । दोस्रो खेलमा (अमेरिकाविरुद्ध) ओमानको लागि विजयी रन जोडेका थिए ।
पहिलो खेलमा (नेपालविरुद्ध) उनी दोस्रो बलमा डक आउट भएका थिए । सुरजलाई सुशन भारीले ज्ञानेन्द्र मल्लको हातबाट स्लिपमा क्याच आउट गरेका थिए ।
ओमान र नेपालको पिचमा भिन्नता पाउँदा उनले पहिलो खेलमा रन बनाउन नसकेको बताए ।
’ओमानको पिच फ्ल्याट हुन्छ तर नेपालका बल घुम्ने रहेछ ।’ सुरजले अमेरिकाको खेल पश्चात भने, ’हिजोको खेलले पनि पाठ सिकायो । हिजोको गल्ती नदोहर्याउने सोचेको थिएँ । त्यसैले विकेटमा समय लिएर खेलें ।’
ओमानका विकेटकिपर ब्याट्सम्यान सुरजलाई नेपाली भूमिमा समेत राम्रो समर्थकको साथ मिलेको छ । नेपालविरुद्ध ब्याटिङमा उत्रँदा होस् वा खेल सुरु हुनु अघि अभ्यास गर्दा, उनलाई नेपाली समर्थकले उनकै नामले समर्थन गर्दै थिए ।
खेल सकिए लगत्तै उनीसँग फोटो खिच्न समर्थकले सुरजलाई मैदान छेउमै बोलाएका थिए ।
सुरज पहिलो पटक काठमाडौं आउँदा निकै खुसी छन् । दोस्रो पटक नेपाल आएका सुरज यसअघि ६–७ वर्षको हुँदा बाग्लुङमात्र आएका थिए ।
’काठमाडौंआउँदा निकै खुसी छु ।’ सुरजले थपे, ’६–७ वर्षको सानो बेला नेपाल आएको थिए तर काठमाडौं भने पहिलो पटक हो ।’
सुरजका आमा बुवा समेत उनलाई समर्थन गर्न नेपाल आएका छन् । उनको सफलतामा घर परिवार सबै खुसी रहेको उनी सुनाउँछन् ।
३१ वर्षे सुरजले नेपालविरुद्ध रन जोड्न नसके पनि अमेरिकाविरुद्ध ३५ बलमा ३३ रनको अविजित पाली खेलेका थिए । ओमानको ६ विकेट जितमा सुरजले मोहमद नदीमसंग ६३ रनको महत्वपूर्ण साझेदारी गरेका थिए ।
खेलाडी र प्रशिक्षकको मेहनतका कारण हाल ओमानले क्रिकेटमा फड्को मारेको बताउँछन् ।
’खेलाडी तथा प्रशिक्षक सबै मेहनती छन् । सबै आफ्नो फिट्नेसमा ध्यान दिन्छन् । त्यसैले टिम अघि बढ्दै छ ।’ ओमानले पछिल्लो समय क्रिकेटमा उल्लेखनीय सफलता हात पार्नुको कारण उनले बताए ।
सुरज नेपालबाट माया पाउँदा साह्रै खुसी लागेको बताउँछन् । करिब ४ महिनाअघि ओमानले आतिथ्यता गरेको पाँच देशीय सिरिजमा नेपालविरुद्ध खेलेका सुरजलाई नेपाली समर्थकले राम्रोसंग चिनेका थिए ।
त्यसयता उनलाई नेपाली समर्थकले नेपाली खेलाडीलाई जस्तै माया गर्न थालेको उनी बताउँछन् ।
तस्बिर - क्यान
