अमेरिकाद्वारा ओमानलाई २ सय १४ रनको लक्ष्य

काठमाडौं । आईसीसी विश्वकप क्रिकेट लिग–२ अन्तर्गत त्रिकोणात्मक सिरिजको दोस्रो खेलमा अमेरिकाले ओमानलाई जितका लागि २ सय १४ रनको लक्ष्य दिएको छ ।

टियु क्रिकेट मैदानमा टस हारेर पहिले ब्याटिङ गरेको अमेरिकाले ५० ओभरमा अलआउट हुँदै २ सय १३ रन बनायो ।

अमेरिकाका लागि इयन होल्याण्डले ६५ रनको अर्धशतकीय इनिङ्स खेले । यस्तै अक्षय होमराजले ४४ रन बनाए ।

मोनाक पटेलले १९ रन जोड्दा कप्तान सौरभ नेत्राभाल्करले अविजित १४ रन बनाए ।

ओमानका मोहमद नदीमले ३ विकेट लिए । यस्तै बिलाल खान, इकाब इलास र जिसन मक्सुदले २/२ विकेट लिए ।

सिरिज अन्तर्गत पहिलो खेलमा ओमानले नेपाललाई १८ रनले हराएको थियो ।

लिगमा अमेरिका ८ खेलमा ६ जित हात पार्दै १२ अंकका साथ तालिकाको शीर्ष स्थानमा छ ।

ओमान ७ खेलमा ५ जित सहित १० अंकका साथ तालिकाको दोस्रो स्थानमा छ ।