काठमाडौं । ओमान क्रिकेट टिमले नेपाली क्रिकेट समर्थकको खुलेर प्रशंसा गरेको छ । विश्वकप क्रिकेट लिग–२ अन्तर्गतको सिरिज खेल्न नेपाल आएको ओमानले पहिलो खेल हेर्न आएका समर्थकको प्रशंसा गरेको हो ।
नेपाली समर्थकको साथ पाएकोमा ओमानका खेलाडी खुसी देखिएका थिए ।
’समर्थकको भीड उल्लेखनीय थियो । समर्थकले दुवै टिमको समर्थन गरे ।’ ओमनका कप्तान जिसन मक्सुदले भने, ’खाली रंगशालामा खेल्न मजा आउँदैन । क्रिकेट खेल नै यस्तै हो । यस्तै समर्थकको साथ फेरी पाउने अपेक्षा छ ।’
एसोसियट राष्ट्रको खेलमा बिरलै समर्थकको भिड देखिने गर्छ । घरेलु टिमले समेत मैदानमा सिमित संख्यामा समर्थकको साथ पाउने गर्छन् । एसोसियट मात्र नभएर कतिपय टेष्ट राष्ट्रमा समेत उस्तै खराब हुन्छ ।
तर नेपालको अवस्था फरक छ । नेपालको कुनै पनि अन्तराष्ट्रिय खेलमा समर्थकको बाक्लो उपस्तिथी हुने गर्दछ । उनीहरुले नेपालसंगै विपक्षी टिमको समेत समर्थन गर्ने गरेको देखिन्छ ।
नेपाली टिमको समर्थन गर्न आएका दर्शकले खेल हातबाट फुत्किएको अवस्थामा विपक्षी टिमको समेत समर्थन गर्ने गर्छन् ।
ओमनविरुद्धको खेलमा नेपाली टिम हाबी रहेको (५७ रनको स्थितीमा ५ विकेट गुमाएको बेला) ओमानले ३६ औं ओभरमा १ सय पुर्याउदा सबै समर्थकले ताली बजाएका थिए ।
यस्तै ओमनका नदीमले अर्धशतक पुरा गर्दा समेत नेपाली समर्थकले स्वागत गरेका थिए । जवाफमा नदीमले समेत ब्याट समर्थकतर्फ देखाएर खुसी मनाएका थिए ।
’समर्थकले दुवै टिमलाई समर्थन गरेको देख्दा खुसी लाग्यो । थुप्रै देशमा यस्तो हुँदैन तर नेपाली समर्थकले दुवै टिमको समर्थन गरेको देख्दा कदर गर्छौं ।’ खेलका म्यान अफ दी म्याच बनेका मोहमद नदीमले समर्थकलाई धन्यवाद दिंदै भने ।
खेलमा घरेलु टिम ओमनसंग नेपाल १८ रनले पराजित भएको थियो । नेपाली टिम ब्याटिङमा चुक्दा एतिहासिक घरेलु मैदानमा खेलिएको एकदिवसीय अन्तराष्ट्रिय जितबाट पछाडी परेको थियो ।
नेपालको इनिङ्समा सुरुवाती क्रमका ब्याट्सम्यान चल्न नसक्दा टिम पराजित भएको हो । नेपाल आफ्ना ओपमन दुवै खेलाडीलाई ४ रनमा गुमाउँदा दबाबमा आएको थियो ।
त्यसपछिका ब्याट्सम्यान दिपेन्द्र ऐरी र शरद भेसवाकरले अर्धशतकीय साझेदारी गर्दै टिमलाई लयमा फर्काएका थिए ।
तर नदीमले दिपेन्द्रलाई एलबीडब्लुको धरापमा पारेपछि नेपाली टिम पुन दबाबमा आएको थियो । दिपेन्द्रपछि आरिफ शेख र रोहित लगातार आउट भए ।
बिनोद भण्डारी र सन्दीप लामिछानेले आक्रमक क्रमश २६ र २८ रन बनाउँदा नेपालले हार अन्तर कम गरेको थियो ।
विनोदको विकेटपछि सन्दीप र शरदले ३८ रनको शाझेदारी गर्दा जितको झिनो आस देखिएपनि शरद व्यक्तिगत ५५ रनमा आउट हुँदा खेल औपचारिकतामा बाँकी रहेको थियो ।
लिग अन्तर्गत अब नेपालले अमेरिकासँग शनिबार खेल्नेछ ।
