काठमाडौ । सहिद स्मारक ए डिभिजन लिगमा विभागीय टिम त्रिभुवन आर्मीविरुद्ध हिमालय शेर्पा क्लबले शुक्रबार १२ खेलाडी मैदान उतार्यो ।
सातदोबाटोस्थित एन्फा कम्प्लेक्सको खेल पहिलो हाफ गोलरहित बराबरीमा सकिएको थियो । तर दोस्रो हाफमा ड्रेसिङ रुमबाट फर्किएपछि शेर्पाले मैदानमा १२ खेलाडी छिरायो ।
परिवर्तनको तयारीमा रहेका बिसोन गुरुङ दोस्रो हाफको सुरुवातमै मैदान छिरे । ड्रेसिङ रुमबाट मैदान आएका उनलाई ‘फोर्थ’ रेफ्री प्रज्वल क्षेत्रीले भित्र जान इशारा गरेपछी उनी मैदान पसेका थिए ।
दोस्रो हाफमा शेर्पाले १२ खेलाडीलाई करिब ३ मिनेट खेलायो ।
त्यसपछि भने आर्मीका अफिसियलले शेर्पाका १२ खेलाडी मैदान छिरेको पत्तो पाए । अनि खेल रोकियो ।
आर्मी अफिसियलले केही बेरनै खेल रोकेका थिए ।
खेल रोकिएपछि लिग निर्देशक सञ्जिव मिश्र र अन्य म्याच अफिसियलले खेल सुचारु गराउने वातावरण बनाए ।
खेलका क्रममा ‘फोर्थ’ रेफ्रीले गम्भीर भुल गरेपछि सो अवस्था आएको हो ।
खेलको सुरुवातमै मैदान छिरेका बिसोन फेरी ५२ औ मिनेटमा बिनोद गुरुङको स्थानमा मैदान पसे । उनलाई रेफ्रीले कुनै कार्ड देखाएनन् ।
आर्मी र शेर्पाविरुद्धको खेलमा म्याच कमिस्नर वसन्त रिजाल थिए । यस्तै रेफ्री एसेसरमा श्याम लामा, जेनेरल कोर्डिनेटरमा अशोक मानन्धर रहेका थिए ।
यस्तै रेफ्रीमा पुर्ब फिफा रेफ्री प्रकाश नाथ श्रेष्ठ, एसिस्टेन रेफ्रीमा रोजेन श्रेष्ठ र किशन यादब रहेका थिए ।
खेलपछी रेफ्री एसेसर श्याम लामाले बाहिर रहेको घाईते खेलाडीलाई भित्र बोलाउँदा संगै रहेका अर्का खेलाडी समेत मैदान छिर्दा सो वातावरण बनेको बताए ।
“भुलबस १२ खेलाडी भयो । घाइते खेलाडी र परिवर्तन हुन लागेका खेलाडी संगै थिए । तर रेफ्रीले घाईते खेलाडीलाई भित्र बोलाउँदा बिसोन भित्र छिरेछन् । समस्या हल गर्यौ ।“ लामाले भने ।
त्रिभुवन आर्मी क्लबका प्रशिक्षक नबिन न्यौपाने खेलमा रेफ्रीबीच समन्व्य नहुँदा सो घटना भएको बताए ।
“खेल सुरु भएपछि पनि खेलाडी मैदान छिरिरहेका थिए । सोही कारण शेर्पाले १२ खेलाडी खेलायो । रेफ्रीले मैदानमा खेल सुरु नहुँदै खेलाडी गन्नु पर्ने हो, सो भएन ।“ उनले भने ।
शेर्पाका प्रशिक्षक संजिब बुढाथोकीले खेलाडी परिवर्तन हुने बेला भएको घटनालाई सामान्य रुपमा लिनुपर्ने बताए ।
“खेलाडी परिवर्तन हुने समयनै थियो । रेफ्रीले छिराएपछि खेलाडी मैदान गएको हो । रेफ्रीले थाहा पाएपछि निकाले ।“ उनले भने ।
पुन खेल सुचारु भएपछि आर्मीले लगातार दुई गोल गर्यो । उसका लागि कप्तान भरत खवासले खेलको ५७ मिनेटमा पहिलो गोल गरे । त्यसको ५ मिनेटमै टेक बहादुर बुढाथोकीले आर्मीको अग्रता दोब्बर बनाएका थिए ।
