बक्सिङ : सनिल र भुपेन्द्र सेमिफाइनलमा

काठमाडौं । १३ औं दक्षिण एसियाली खेलकुद (साग) अन्तर्गत बक्सिङको पहिलो दिन नेपालका सुशील थापामगर, भुपेन्द्र थापा मगर र सनिल शाहीले जित हासिल गरी सेमिफाइनलमा प्रवेश गरेका छन् ।

सातदोबाटोमा शुक्रबार भएको पुरुष ४९ केजी फ्लाई वेटतर्फ श्रीलंकाका मुटुनाकापा पीजीलाई अंकको आधारमा हराउंदै सुशीलले सेमिफाइनलमा स्थान पक्का गरे । त्यस्तै ६० केजी तौल समूहको खेलमा भूटानका निमा दोर्जीलाई अंककै आधारमा पराजित गर्दै नेपालका सनिलले पनि अन्तिम चारमा स्थान बनाए ।

त्यस्तै ६४ केजीको भिडन्तमा नेपालका भुपेन्द्रले भूटानका दोर्जी वाङ्दीलाई पहिलो राउन्डमा नै आरएससीको आधारमा पराजित गर्दै सेमिफाइनलमा स्थान सुरक्षित गरे । त्यसैगरी ७५ केजी तौल समूहको खेलमा नेपालका दिपक श्रेष्ठ भने भारतका अंकित खतानासंग तेस्रो राउन्डमा नकआउटको आधारमा पराजित भए ।

त्यसैगरी पुरुष ९१ केजीभन्दा माथिको तौल समूहमा भने नेपालका आशिष दुवाडी र महिला ६४ केजी तौल समूहमा पूनम रावलले बाइ पाएर सोझै फाइनलमा स्थान पक्का गरेका छन् । योसंगै बक्सिङमा नेपालले दुई रजत पक्का गरेको छ ।

त्यसअघि शुक्रबार भएको महिलातर्फको पहिलो खेलमा भारतका कलाइभानी श्रीनिभासनाले पाकिस्तानका राबिया बाटूललाई आरएसीको आधारमा पराजित गरे । त्यस्तै महिला ५७ केजी तौल समूहको खेलमा भारतका सोनीया लाथरले बंगलादेशमा समिमा अख्तरलाई पनि आरएसीको आधारमा पराजित गरे । त्यस्तै पुरुष ४९ केजीमा बंगलादेशका मोहमद सोजिब होसेनले पाकिस्तानका मोहमद दाउद खानलाई पराजित गरे ।

त्यस्तै पुरुष ५२ केजीमा बंगलादेशका मोहमद आरिफुल इस्लामले पाकिस्तानका सइद मोहमद आसिफलाई हराए । पुरुष ५६ केजीमा बंगलादेशका मोहमद रोबिन मिया र नाकिबुल्लाह विजयी बने । त्यसैगरी ६४ केजीको खेलमा भारतका मनिष कौशिकले पाकिस्तानका सुलेमान बालोचलाई हराए । पुरुष ६९ केजीमा भने पाकिस्तानका गुल जाइब र भारतका कृसन भिकासले पनि जित हात पारे ।