'ए' डिभिजन लिगको 'ड्र' भोली सार्वजनिक हुने

काठमाडौं । सहिद स्मारक 'ए' डिभिजन लिग फुटबलको खेल तालिका भोली (शुक्रबार) सार्वजनिक हुने भएको छ ।

अखिल नेपाल फुटबल संघ (एन्फा) ले मंसिर अन्तिम साताबाट सुरु हुने लिगको खेल तालिका शुक्रबार दिउँसो सार्वजनिक गर्ने जनाएको छ ।

एन्फा कम्प्लेक्स सातदोबाटोमा दिउँसो २ बजेपछि खेल तालिका सार्वजनिक गरिने छ ।

'ए' डिभिजन लिग मंसिर २८ गतेबाट सुरु हुनेछ । रेलिगेसनसहितको हुने लिगमा १४ क्लबले प्रतिस्पर्धा गर्ने छन् ।

प्रतियोगिताका लागि १४ क्लबले १८/१८ खेलाडी दर्ता समेत गराईसकेको एन्फाले जनाएको छ ।

एन्फाले गत वर्ष आयोजना गरेको रेलिगेसनबिनाको 'ए' डिभिजन लिगको उपाधि मनाङ मर्स्याङ्दी क्लबले जितेको थियो ।

यस्तै एन्फाले एन्फा कम्प्लेक्सको गेट अगाडी निर्माण गरिएको पार्कको उद्घाटन समेत शुक्रबार गर्ने जनाएको छ ।