पुलिसको फुटबल टिमलाई टेलिकमको प्रायोजन

काठमाडौं । नेपाल पुलिस क्लबको पुरुष र महिला फुटबल टिमलाई नेपाल दूरसञ्चार कम्पनी लिमिटेड, नेपाल टेलिकमले प्रायोजन गरेको छ ।

नेपाल प्रहरी खेलकुद समितिले बुधबार टेलिकमसँग मुख्य प्रायोजक सम्झौतामा हस्ताक्षर गरेको छ । टेलिकमले पुलिसको फुटबल टिमलाई ३२ लाखको प्रायोजन गरेको हो ।

प्रहरी प्रधान कार्यालयमा नेपाल प्रहरी खेलकुद समितिका अध्यक्ष प्रहरी महानिरीक्षक सर्वेन्द्र खनाल र नेपाल टेलिकमका प्रबन्ध निर्देशक डिल्लीराम अधिकारीले समझौतापत्रमा हस्ताक्षर गरेका थिए ।

टेलिकमले पुलिस क्लबलाई १ वर्षको लागि प्रायोजन गरेको हो । सम्झौतासँगै टेलिकमले क्लबलाई ३२ लाख रुपैयाँ उपलब्ध गराउने छ ।

यस्तै पुलिसले सहभागिता जनाउने फुटबल प्रतियोगितामा पुलिसले टेलिकम अंकित जर्सी प्रयोग गर्नेछ ।