खेलकुदमन्त्रीले बोलाए साग तयारी समितिको बैठक

काठमाडौं । खेलकुद मन्त्री जगतबहादुर विश्वकर्माले दक्षिण एसियाली खेलकुद प्रतियोगिता (साग)को तयारी व्यवस्थापन तथा तयारी समितिको बैठक बोलाएका छन् ।

सागको लागि आर्थिक कार्यविधि पारित भएसंगै खेलकुदमन्त्रीले तयारी समितिको बैठक बोलाएका हुन् ।

साग आयोजनामा अहिलेसम्म भएको प्रगतिको छलफल गर्न र बाँकी काम पुरा गर्ने कार्ययोजना बनाउन तयारी समितिको बैठक बोलाईएको खेलकुद मन्त्रीको नीजि सचिवालयले जनाएको छ ।

यसअघि खेलकुद मन्त्रीले बैशाख २६ गते सागको तयारी समितिको बैठक बोलाएका थिए ।

सोही बैठकले बजेट निर्धारणका लागि कार्यदल गठन गर्नुका साथै खेलाडीको बन्द प्रशिक्षण सुरु गर्ने निर्णय गरेको थियो ।

त्यसपछि सागको तयारी समितिको बैठक पहिलो पटक बस्न लागेको हो ।

‘सागको तयारीका सम्बन्धमा अहिलेसम्म भएका कामको समिक्षा गर्दै थप गर्न बाँकी कामको बिषयमा छलफल गर्न बैठक राखिएको हो ।’ खेलकुद मन्त्रीको नीजि सचिवालयले भनेको छ ।

बैठकमा समितिका सम्पुर्ण सदस्यलाई उपस्थितीका लागि अनुरोध गरिएको छ । बैठक सिंहदरबारस्थित खेलकुद मन्त्रालयमा बिहिबार दिउँसो ३ बजे बस्नेछ ।

सरकारले सागको तयारीका लागि खेलकुद मन्त्रालयलमार्फत राखेपलाई प्रारम्भिक बजेट बिनियोजन गरिसकेको छ ।