सागको लोगो र मस्कट मनास्लु पुर्‍याइने

काठमाडौं । नेपालमा आयोजना हुने १३ औं दक्षिण एसियाली खेलकुद (साग) को लोगो र मस्कट अंकित ब्यानर  ‘किलर माउन्टेन’ ले परिचित मनास्लु हिमालको चुचुरोमा पुर्‍याइने भएको छ ।

आरोही प्रकाशराज पाण्डेले उक्त ब्यानर ८ हजार १ सय ६३ मिटर उचाईको हिमाल मनास्लुको चुचुरोमा लान लागेका हुन् ।

राष्ट्रिय खेलकुद परिषद् (राखेप) का सदस्य–सचिव रमेशकुमार सिलवालले सफलताको शुभकामना दिदै ब्यानर प्रकाशलाई बिहीबार हस्तान्तरण गरे । मनास्लुको चुचुरोमा पुर्‍याएको ब्यानरलाई सागको उद्घाटन समारोहमा हस्तान्तरण गर्ने प्रकाशले जानकारी दिए ।

सेप्टेम्बर तेश्रो साता प्रकाश मनास्लु आरोहण गर्ने तयारीमा छन् ।

रामेछाप निवासी २८ वर्षीय प्रकाशले विश्वको सर्वोच्च शिखर सगरमाथा, अमादब्लम र आईल्यान्ड पिकको १–१ पटक सफल आरोहण गरिसकेका छन् । उनले बडेन पावेल स्काउट पिकको पनि २ पटक सफल आरोहण गरिसकेका छन् ।